Aına qoıdym aldyma,
Kóreıin dep ózimdi.
Eki qulaq tars bitip,
Shel basypty kózimdi.

Iis biler muryn joq,
Taza aqyldan yrym joq,
Túzelerlik túrim joq,
Jalǵan deme sózimdi.

Aq nıetim buryn joq,
Júregimde nurym joq,
Jasyratyn syrym joq,
Aıtpaı aram bezimdi.

Jalǵyz meni deme qor,
Meni kór de, sene kór,
Sen de emessiń menen zor,
Dál men dep bil ózińdi.

Adamnyń bárin elese,
Alamyn dep irisin,
Bári ótedi ári qaraı,
Sen de sonyń birisiń.

Elekte qalmas bir adam,
Ne ǵylymdy, ne nadan.
Biz sıaqty barsha jan
Sorǵa satqan yrysyn.

Yndyny taza eshkim joq,
Syrtynda maı, ishinde oq.
Túp qaryny tolǵan boq,
Jasyryp júr munysyn.

---