InfoHub Logo

Ertede Áshim degen bir kisi aýylnaı saılanypty. Áshim aýylnaı bolysymen, tilge erip, qatelese beripti. Para alypty. Bir kúni bazarǵa kelse, bireý gazet oqyp turady. Tyńdap baqsa: ózi týraly feleton basylǵan eken. Ol dereý eki jigitti ońasha shaqyryp alyp:

— Qaraǵym, osy gazetińdi satshy, — deıdi. Jigit sózge kelmeı bere salady.

Gazetti qoınyna tyǵyp alyp, jigitti asqanaǵa ertip kep, ábden syılaıdy. Odan shyǵysymen shaýyp otyryp úıine keledi. Attan túspeı jatyp, áıelinen shúıinshi surap, aıǵaı salady:

— Oıpyr-aı, báıbishe-aı! Qudaı bir páleden saqtady! Búgin bazarǵa barǵanym mundaı jaqsy bolar ma! Meni bireý gazetk jazypty. Sol gazetti alyp keldim. Bul gazet bireýdiń qolyna tússe, shalyńnan aırylǵanyń ǵoı. Mine, eshkimge kórsetpe! Sandyqqa myqtap tyǵyp qoı. «Ia, Qudaı, árdaıym osylaı saqtasyn» dep jaǵasyn ustaıdy. Tósekke jatqannan keıin de Qudaıǵa syıynyp, bir páleden qutyldym dep esepteıdi.

Birneshe kún ótkennen keıin Áshimdi mılısıa shaqyryp, tergeýge alady. Gazettiń kesindisi mılısıanyń aldynda jatady. Áshim terisine syımaı úıdegi áıeline jatyp kep ashýlanady. «Áıel dushpan degen osy eken ǵoı. Sandyqta jatqan gazetti myna mılısıaǵa bergenin qarashy» dep oılaıdy. Mılısıadan bosanysymen shaýyp úıine keledi. Attan túspeı:

— O, báıbishe, úıdemisiń? Jaýym sen ekensiń ǵoı, meniń túbime jetetin boldyń! — dep aıǵaı salady. Kempir oıbaılap:

— Meniń ne jazyǵym bar? Tym bolmasa kinámdy moınyma qoı! — depti.

— Sen ońbaǵan, úıde tyǵýly jatqan gazetti mılısıaǵa nege berdiń?

— Oıbaı, mılısıasy nesi? Mine onyń! — dep, áıeli gazetti sandyqtan sýyryp bergende, Áshim ony qolyna ustaǵan kúıi ańyryp turyp:

— Onda gazettiń taǵy bireýi bar eken ǵoı. Qap, kórmegenim-aı! Ony da satyp alatyn edim, — dep sanyn bir-aq soǵyp otyra ketipti.

---