InfoHub Logo

Jasymda ákem moldaǵa oqýǵa berdi. Molda badyraq kóz, eki qulaǵy qalqıǵan, shoqsha saqaldy, túsi sýyq, qara qaıraqtaı kisi edi. Osyndaı zárli túsine minezi saı tym qatal adam bolatyn. Balalar qybyr etse, bulan-talan ashýlanyp, yzaǵa býlyǵyp qaltyrap ketetin. Bul kezde qolyna túsken shákirtke aıaýsyz dúre soǵatyn.

Sabaqty úıde jaqsy jattap, daıyndap kelemin. Basqa balalardan suraǵan kezde de bilip turamyn. Biraq ol kózin alartyp, tarpa bassalardaı eńkeıe basyp, maǵan jaqyndaǵan saıyn zárem ushyp, qaltyraı berem. Al qasyma kelip atymdy ataǵanda selk ete túsemin de, bilip turǵanymnyń bári esimnen shyǵyp ketedi. Bir kúni osylaı qorqyp qaltyrap turǵanymda molda maǵan tóne:

— Kárim, sabaqty aıt! — dedi.

— Álip, bı, tı... — dep ejiktep áripterdi aıta berdim. Osylardan keıin bir árip bar edi, ol esime tússinshi, káni. Ary oılandym, beri oılandym, aýzyma túspedi. Moldanyń kózi ejireıip, meni jep barady. Ashýy kelip, saqaly dirildeı bastady.

Keshiksem shapalaq betime sart ete túskeli tur. Sóıtip jantalasa oılanyp turǵanymda qarsymda otyrǵan bala meni qutqarǵysy kelgendeı kózin qolymen basyp qaldy. Sol-aq eken:

— Bas kózińdi, Moldeke! — dep shańq ete tústim.

— Ne dediń, júzi qara?! — dep molda shapalaqpen jaǵymnan tartyp jiberdi de, — tur dúrege! — dedi.

...Esten tandyra soqqan shybyqtan keıin ornyma táltirektep kelip otyrǵanymda, álgi áriptiń aty «jum» ekeni esime sonda baryp túskeni ǵoı.

---