InfoHub Logo

Bir buzaý, bir toqty, laq el kóshkende jurtta qalypty. Úsheýi adam bolyp qos turǵyzyp alypty. Qosy bir bulaqtyń boıynda eken, qasynda báıteregi bar eken. Bulardyń habaryn estip, bir aıý jeımin dep, qostyń qasyna kelgen eken. Laq aıýdy kórip aldynan júgirip shyǵyp, qosyna ákelip, esik ashyp engizedi. Úıge kirgen soń: «Aıýǵa ne beremiz?» – deıdi toqty. Sonda laq aıtady:

– Basqy aıýdyń basyn as, sońǵy aıýdyń tósin as, bolmasa, osy aıýdyń ózin soıyp as! – deıdi. Bular aıý jeıdi eken dep, aıý ornynan tura qashady. Qashyp kele jatsa, oǵan qasqyr jolyǵa ketip: «Qaıdan qashtyń?» – dep suraıdy. Aıý: «Mine jerde toqty, laq, buzaýǵa baryp edim, ózimdi jeımin degen soń, qashyp áreń qutyldym», – deıdi. «Endeshe, ekeýimiz de baralyq, birigip jelik», – deıdi qasqyr. Aıý: «Men barmaımyn», – deıdi. Qasqyr bir jip taýyp, bir jaǵyn aıýdyń moınynan baılap, bir jaǵyn óziniń moınyna baılap alyp júredi. Qosqa jaqyndaǵanda, laq shyǵyp: «Ol aıýǵa toımaımyz», – deıdi. Bul sózden burynǵydan jaman qorqyp qaıta qasha jóneledi. Qasqyr býynyp, jyǵylyp qalady. Bul jyǵylyp jatqan qasqyrǵa ekinshi qasqyr kelip: «Sen ne qyp jatyrsyń?» – deıdi. «Men ne qyp jataıyn, aıý súırep ketti», – dep, bastan-aıaq jónin aıtady. Sonymen úsheýi qaıtadan barady. Muny kórip, úsheýi báıterekke shyǵypty. Laq basyna, toqty ortasyna, buzaý artyna turypty. Túbine kelip qasqyr bal ashyp: «Jeımiz be, joq pa?» – dep turǵanda, butaq synyp, buzaý jerge qulap túsedi. Qulaǵan buzaýdan qorqyp qasqyrlar bet-betine qashyp ketedi. Buzaý, laqtyń ıesi kúz aınalyp kelip, qosty taýyp alady. «Bir laqtyń aqyly sondaı bolypty» dep qazaqtyń aıtatyny osy.

---