InfoHub Logo

Bir qańbaqty jel aıdap, úlken taýdyń etegine ákep tastap ketti. Muny bıikten kórip turǵan taý:

— E, qańbaǵym, qaıdan júrsiń, ne qyp keldiń munda? — dedi. Qańbaq turyp:

— Alty batpan aýyrdy kótergen alyp edim. Jeti qabat jer astynan shyǵyp, alyp degen ataǵyńdy estip, alysý úshin ádeıi seni izdep keldim, — deıdi.

Taý buǵan jymıyp kúldi. Sol kezde quıyn soǵyp, qańbaqty dedektetken boıy aspanǵa alyp shyqty. Aspannan qaıta jerge ákelip, ary-beri aýnatty. Oıǵa-qyrǵa domalatty. Aqyr aıaǵy óldim-taldym degende, taýdyń betine ósken bir shoq tobylǵynyń basyna ilip tastap, jaıyna júrip ketti. Qany qashyp, qabaǵy túsken qańbaqtyń qasyna bir búrkit keldi. Ol:

— E, qańbaǵym, ne qyp jatyrsyń? — dedi.

Qańbaq:

— Alty batpan aýyrdy arqalaǵan edim. Jeti qabat jer astynan shyǵyp, alyp degen ataǵyn estip, astymda jatqan taýmen ádeıilep kelip alysyp edim, alty kún alysyp, jeti kún degende, áreń dep jyǵyp, jelkesinen basyp jatyrmyn, — deıdi.

— Bolsa bolar! — dedi búrkit oǵan. — Tobylǵyǵa zorǵa ilinip qalǵan ekensiń!

— Álbette, — dedi qańbaq, — odan basqa qolaıly jer bolmaǵan soń, tobylǵysynan ustap jatqanym ǵoı.

Sol kezde quıyn soǵyp, qańbaqty taǵy da dedektete jóneldi. Búrkit turyp:

— E, batyr, qaıda barasyń, taýdy tastap? Turyp ketpeı me ol endi ornynan? — dedi.

Ýaqa emes, búrkitim. Aldymda alysatyn áli de kóp alyptar bar edi. Solarǵa jetýge asyǵyp baramyn! — deýge ǵana shamasy keldi qańbaqtyń. Quıynmen birge quldyrap, ushyp kete bardy. Aqyrynda kúlip, búrkit pen taý qaldy.

---