InfoHub Logo

Aqtaý qalasynda 24 jastaǵy Marjan esimdi stýdent qyz páterinde asylǵan kúıde tabyldy. Polısıa bul jaǵdaıdy sýısıd dep tirkep, isti jaýyp tastady. Alaıda, marqumnyń ata-anasy bul sheshimmen kelispeı, qyzdarynyń ólimine kúıeýin kináli dep sanaıdy.

Bul týraly Infohub.kz aqparat agenttigi habarlaıdy.

Stýdenttiń armany men otbasylyq jaǵdaıy

Lada.kz saıtynyń málimetinshe, Marjan medısınalyq kolejinde oqyp, stomatolog mamandyǵyn ıgerýge daıyndalyp júrgen. Onyń aldaǵy ómirine qatysty kóptegen jospary bolǵan: oqýyn bitirip, jumys isteý, bilimin jetildirý kýrstaryna qatysý jáne júrgizýshi kýáligin alý.

Anasynyń aıtýynsha, qyzy ótken jyly turmysqa shyqqannan keıin otbasynda jıi kıkiljińder oryn alǵan. Kúıeýi materıaldyq jaǵynan qoldaý kórsetpese, enesi kelinin aýylǵa kóship, úı sharýasymen aınalysýǵa májbúrlemek bolǵan. Osy jaǵdaılarǵa qaramastan, Marjan oqýyn jalǵastyryp, qosymsha jumys istep júrgen.

Tergeýdiń obektıvtiligine kúmán

Qaıǵyly oqıǵa aldynda eshqandaı alańdaýshylyq týdyrarlyq jaǵdaı bolmaǵan. 31 jeltoqsanda Marjan anasymen kezdesip, bolashaq josparlarymen bólisken. Alaıda, kelesi kúni onyń qaıtys bolǵany týraly sýyt habar jetken.

Bastapqyda is «ózin-ózi óltirýge jetkizý» baby boıynsha qozǵalǵanymen, keıinnen toqtatyldy. Týystary tergeýdiń tolyqqandy jáne obektıvti júrgizilmegenin alǵa tartady. Olardyń pikirinshe, marqumnyń psıhoemosıonaldyq jaǵdaıy jan-jaqty zerttelmegen, keıbir tergeý áreketteri keshiktirilip, barlyq nusqalar tolyq tekserilmegen.

Otbasynyń talaby

Marjannyń jaqyndary onyń ómirge degen qushtarlyǵy joǵary, maqsattary aıqyn adam bolǵanyn aıtyp, onyń sýısıd jasaýy múmkin emes ekenin atap ótedi. Qazirgi tańda otbasy isti qaıta qaraýdy jáne jan-jaqty tergeý júrgizýdi talap etýde.