InfoHub Logo

Shytynaǵan aıaz. Qoılar jyly qorada byrt-byrt kúıis qaıyryp jatady. Syrtta mań tóbetter mańq-mańq úredi. Qorada kúzet saq. Ash qasqyr aýyl syrtyn torýyldaıdy. Arlan bul mańda qoıdyń baryn sezedi. Silekeıi shubyrady. Sóıtip aýylǵa jaqyn keledi. Muny sezgen tóbet ars ete qalady. Qasqyr qasha jóneledi. Japan dala. Qasqyr áldekimge muń shaqqandaı, uzaq ulıdy. Biraq gýlegen borannyń gýili odan basymyraq bolady.

         Bári taǵy da jortýylǵa shyǵady. Tań atady. Aýyldan órgen qalyń qoı óriske betteıdi. Qasqyr otardyń aldyn torıdy. Sol kezde shopan atyna qamshy basady da otardyń aldyńǵy jaǵyna shyǵady.

         — Qap! – dep ókinedi qasqyr. — Atty qoıshy, ashýy qatty qoıshy degen osy da!

         Qasqyr endi bir jyrany jaǵalap, otardyń ekinshi shetine qaraı oıysady. Qarasa, qoıdyń sońynda eki qoıshy áńgimelesip kele jatyr eken.

         — Eki qoıshy – ermek qoıshy, bir toqtysyn bermek qoıshy, – deıdi de aýzyn arandaı ashyp, qoıǵa tap beredi. Úrikken qalyń qoı dúrkirep, keıin sheginedi. Eki qoıshy qatar tura qalyp, qos aýyz myltyqtyń shúrippesin basyp-basyp jiberedi. Omaqaca qulap, bir aýnap turǵan arlan aqsańdaı basyp, aýlaq qashyp ketedi.

         Qasqyrdyń qarny shuryldaıdy. Taǵy da jortýylǵa shyǵady. Taý qoınaýyndaǵy qaptaǵan maldy kóredi. Qarasa, qoı sońynda ógiz mingen qoıshy júr eken.

         — Ý-ý-ý!..– deıdi arlan. — Ógizdi qoıshy – ólgen qoıshy, jep bolǵan soń kórgen qoıshy, – dep, tastardyń tasasymen qoıǵa taqap keledi. Ógiz qasqyrdyń ıisin seze qoıady. Jelkesin kújireıtip:

         — Mó-ó-ó!.. – dep, qoıdyń shetine qaraı óńkeńdeı tura umtylady.

         Joly bolmaǵan kókjal bul jerden de qaıqań etip qasha jóneledi.

         Qasqyr qaıǵyryp, muńǵa batady. Óziniń bóri bolyp jaralǵanyna nalıdy. Amal qansha, ash qaryndy jubatý kerek. Bıik taýdyń basyna shyǵyp, uzaq tyń tyńdaıdy. Jan-jaǵyna kóz salady. Sonaý oıdaǵy bir otardyń sońynda oınap júrgen bala qoıshyny kóredi.

         — Ý-ý-ý!..– deıdi qasqyr aıanyshty únmen ulyp. — Bala qoıshy, aýlaqta oınap qala qoıshy!..

         Bul kezde qasqyrdyń ishi burynǵydan beter ulyp sala beredi. Ash bóri betegeden bıik, jýsannan alasa bolyp, jer baýyrlap qoıǵa jaqyndaı beredi, jaqyndaı beredi. Balanyń kózi qyraǵy eken. Qasqyrdy kóre salady da bar daýsymen aıqaıǵa basady:

         — Bóribasar, Bóribasar, aıt, aıt, aıtaq! Syrttan, Syrttan, aıt, aıt, aıtaq!

         Balanyń ashshy daýsynan eleń ete qalǵan eki tóbet entelep kep, qasqyrdy tarpa bas salady. Ash qasqyr álsiz eken. Eki ıt adymyn ashtyrmaıdy.

---