InfoHub Logo

Qarny ashqan qasqyr tamaq izdep, arsalańdap kele jatady. Sol kezde túlki jolyǵady.

         — Qaseke, jolyń bolsyn! Qaıda jortyp barasyń? – dep suraıdy túlki jylmańdap.

         — Túkem, qarnym ashty. Tamaq izdep baramyn.

         — Qaseke-aı, meniń de qarnym ashyp kele jatyr edi, óziń kezdestiń. Jolym bolady eken. Birge izdeıik.

         — Al, túke, endeshe, basta, – deıdi qasqyr.

         Qasqyr men túlki jorta jóneledi. Bir mezgilde tóńkerilip jatqan qoıdyń tegenedeı quıryǵyna tap bolady. Qýanǵannan qasqyrdyń eki kózi sekseýildiń shoǵyndaı jaınap ketedi. Op-ońaı tabyla qalǵan tamaqqa tańyrqap, túlkiden suraıdy:

         — Túke, túke, bul - ne qylǵan batpan quıryq, teginnen-tegin aıdalada jatqan quıryq?!

         Túlki oılaǵan bop, qıpaqtaı jaýap qaıyrdy:

         — Apyrym-aı, qaseke-aı, bir alańǵasar bazarǵa barǵan shyǵar. Arzan baǵaǵa alǵan shyǵar. Qanjyǵasyna bos baılap, sodan túsip qalǵan shyǵar.

         — Aı, túke, sonda da men osynyńnan qaýiptenip turmyn.

         — Qaseke, sen qaýiptenip, qorqatyn bolsań, men-aq jeı salaıyn, – dep, túlki quıryqqa umtyla bergende:

         — Toqta, toqta! – dep, qasqyr ars ete qalady. Túlki jalt berip, quıryǵyn bulǵańdatyp, shoqıyp otyra ketedi. Ashqaraq qasqyr bylqyldaq quıryqqa aýyzdy salyp kep jiberedi.

         — Qaseke, meni de eskerseıshi! Oljaǵa ortaq emespiz be? – dep, túlki ótirik múláıimsıdi.

         Qasqyr oǵan ala kózimen ajyraıa qarap, tisin aqsıtyp:

         — Byl-jyr-rra-ma... – deıdi de qoıdyń tegenedeı quıryǵyn tórt-aq asap, tolǵap-tolǵap, qylǵı salady.

         Qarny toıyp, qaryq bolǵan qasqyr aýzyn kere qarys ashyp, yńyranyp, bir kerilip alady da jorta jóneledi.

         İshi bilip, murtynan kúlip, qasqyrdyń sońynan kele jatqan túlki:

         — Apyr-aı, qaseke-aı, álgi maı quıryqtan tym bolmasa, bir asam dám tatyrmadyńyz-aý, á?! – dep, kúńkildeıdi.

         — Túke-aý, murnyńa maıdyń ıisi barǵany da jetpeı me! – dep, qomaǵaı kókjal qarq-qarq kúledi.

         Birazdan keıin qasqyrdyń kózi alaqtap, tili salaqtap, janyn qoıarǵa jer tappaı, dóńbekshıdi de qalady.

         — E-e... quıryq jeıtin batyrmysyń, jan bergeli jatyrmysyń?! – dep, túlki qý syqylyqtaı kep kúledi.

         — Emiń bar ma, túlkijan-aý... Túkeshim, aıasańshy aǵańdy, – deýge qasqyrdyń tili áreń kelipti.

         Ý barǵan ishke sý barsa, tez óltiretinin biletin túlki:

         — Ýdyń emi sý bolady, qaseke. Sý ishseń, janyń qalady, sátin salsa, – deıdi.

         Qasqyr bar qalǵan kúshin jınap, sýdy tilimen jalap-jalap alady da qalpaqtaı ushyp túsedi.

         — Mine, saǵan batpan quıryq, aıdalada teginnen-tegin jatqan quıryq! – deıdi de túlki óz jónine kete barady.

---