InfoHub Logo

Májilis depýtaty Asqat Aımaǵambetov «Nazarbaev ýnıversıtetiniń» kadrlyq saıasatyna qatysty syn aıtty. Onyń sózinshe, elimizdegi eń bedeldi oqý orny bola tura, ýnıversıtettiń dekandyq laýazymdarynda qazaqstandyq mamandardyń úlesi óte tómen.

«15 jyl ótti, biraq qazaqstandyq mamandar áli de shette qalyp otyr»

Aımaǵambetov ýnıversıtettiń alǵash qurylǵan jyldary sheteldik profesorlar men menedjerlerdi tartý durys sheshim bolǵanyn moıyndady. Alaıda 15 jyldan astam ýaqyt ótse de, jergilikti ǵalymdar men basqarýshylardyń akademıalyq ortaǵa tolyqqandy kirige almaýy – oılantatyn másele.

– Qazirgi tańda ýnıversıtet dekandarynyń ishinde tek bireýi ǵana – Qazaqstan azamaty. Al jergilikti mamandar negizinen ákimshilik qyzmetterde, ıaǵnı kómekshi personal retinde ǵana jumys isteıdi. Bul jaǵdaıdy ózgertý kerek. Sheteldik mamandardyń úlesi saqtalýy tıis, biraq qazaqstandyq mamandar úshin de teń múmkindikter jasalýy qajet. Akademıalyq ortada tepe-teńdik bolǵany mańyzdy, – dedi depýtat.

«Reıtıń qýalaýdyń ornyna, jergilikti kadrlardy tartý kerek»

Aımaǵambetovtiń pikirinshe, ýnıversıtettiń qazirgi basshylyǵy halyqaralyq reıtıńterge tym kóp kóńil bólip otyr. Bul saıasat bilim berý sapasyna qalaı áser etetini – bólek suraq. Ol ýnıversıtettiń jabyq klýb modelinen bas tartyp, qazaqstandyq ǵalymdar men basqarýshylardy belsendi túrde tartýy kerektigin aıtty.