InfoHub Logo

Maqsaty: Ósimdikter týraly bilimderin keńeıte otyryp, gúlderdiń túrlerimen tanystyrý. Gúlderdiń ataýlaryn, syrt kelbetin, jeke qurylymyn ajyratyp, ataı bilýge úıretý. Tanymdyq qabiletterin damytý. Gúlderdi kútip baptaý erejelerimen tanystyrý. Tabıǵatty qorǵaýǵa, adamgershilikke, uqyptylyqqa, bastaǵan isin aıaqtaı bilýge tárbıeleý.
Ádis – tásilderi: Túsindirý, slaıd kórsetý, suraq - jaýap, sergitý, madaqtaý.
Kórnekilikter: Slaıd: bólme, dala, emdik gúlderi, eńbek quraldary.
Júrý barysy:
Shattyq sheńberi:
Jarqyrap kún de ashyldy,
Aınalaǵa gúl shashyldy.
Qaıyrly kún! Biz kóńildi balamyz,
Qaıyrly kún! Biz súıkimdi balamyz.
Tańǵajaıyp sát: (topqa Masha keledi)
- Sálemetsińder me, balalar!
Tárbıeshi: Amansyń ba, Masha. Qosh keldiń! Qolyńdaǵy ne?
Masha: Meniń qolymdaǵy – bólme ósimdigi. Men myna gúldi úlken de, ádemi etip ósirgim keledi, biraq qalaı ósetinin, qalaı ósirý kerek ekenin bilmeı turmyn, sender maǵan osy gúldi ósirýge kómektesesińder me?
Tárbıeshi: Masha sen renjime, seniń qolyńdaǵy gúl jasandy, sol sebepti ol gúl óspeı tur. Al, bizdiń balalarymyz sizge tabıǵı gúldiń qalaı ósetinin kórsetedi.
- Balalar biz árqashanda úlkenderge kómektesýimiz kerek, sondyqtan qazir Mashaǵa gúldi qalaı otyrǵyzyp, baptaýǵa bolatynyn kórsetip, kómektesemiz. Aldymen men gúlder týraly túsinik berip óteıin. Sizder muqıat qarap, tyńdap alyńyzdar!
Tárbıeshi: - Gúl degenimiz - ósimdik, olar ómir sáni, tabıǵat kórki. Gúlder terezelerdiń aldyna sán bergenimen qoımaı, bólme aýasyn tazartady, adamdarǵa jaqsy kóńil - kúı syılaıdy. Gúlderdiń de jany bar,
adamdarmen sóıleskendeı olarmen de sóılesip, óz iltıpatyńdy bildirip, baptap, kútip, súıispenshilikpen qarap, erkeletip turý qajet.
Gúlderdiń qurylysyn qaraıyqshy: tamyry, sabaǵy, japyraǵy, tostaǵanshasy, kúltesheleri, atalyǵy men analyǵy. (slaıdpen)
Dıdaktıkalyq oıyn: «Gúl qurastyr»
Sharty: Balalar gúldiń qurylymyn atap, qurastyrýy kerek.
(Balalar oıynnyń sharty boıynsha sýretterdi ret - retimen ornalastyrady).
- Gúlderdiń uzaq ýaqyt aýyrmaı, jaıqalyp turýy úshin ne isteý kerek?
- Kútip - baptaý kerek. Gúlderdi julmaý kerek. Gúlderdi baspaý kerek.
Gúlder ósip turǵan bólmede biz ózimizdi qýanyshty sezinemiz, kóńilimiz kóterińki bolady. Olardyń kóptegen túrleri bolady. Tústeri de ár túrli bolady.
Gúlder úsh topqa bólinedi: dala gúlderi, bólme gúlderi, emdik gúlderi. (Slaıd arqyly kórsetý).
Dala gúlderi: báısheshek, raýshan, qyzǵaldaq, baqbaq, astra. Bul gúlder kóktemde, jazda ósedi.
Raýshan gúli - hosh ıisti gúl. Bul gúl dalada ósedi. Ony merekelerde, syı qurmet retinde berýge bolady
Bólme gúlderi: aloe, kaktýs, fıkýs, geran. Bul gúlder jyldyń tórt mezgilinde debólmede ósedi.
Gúldiń jaqsy ósýi úshin jaryq, ylǵaldy aýa jáne bólme temperatýrasy birqalypty, ıaǵnı jyly bolý kerek.
Emdik gúlderi: aloe, anıs, adyraspan, túımedaq, qalampyr. Bul gúlder bólmede de, dalada da ósedi
Aloe gúli - onyń japyraqtary tikenekti bolǵanymen qolymyzǵa kirmeıdi. Aloenyń emdik qasıeti bar, eger de júgirip bara jatyryp, jaraqat alǵan jaǵdaıda osy aloe keskinin kesip alyp, jaraqat alǵan jerge tıgizip biraz ýaqyt ustap tursaq, jara jyldam jazylady. (Balalar tyńdaıdy.)
- Balalar, biz tájirıbe júzinde gúldi qalaı otyrǵyzý, qalaı kútip baptaý kerektigin kórseteıikshi. Kel, Masha, saǵan gúldi otyrǵyzyp úıreteıik.
Tárbıeshi jetekshi suraqtar qoıa otyryp, balalardyń jaýaby arqyly Mashaǵa gúl otyrǵyzýǵa kómektesedi.
- Aldymen, gúldiń óskinin qıyp alyp, onyń tamyry shyqqansha sýǵa salyp qoıamyz. Shelekke qunarly topyraq salyp, tamyry bar óskindi sol topyraqqa otyrǵyzamyz. Tamyry topyraqtyń astynda bolady, olar kórinbeıdi, gúlderdiń sý ishýine kómektesedi, sondyqtan da olarǵa sý quıyp turý qajet. Gúlderdiń tamyry dem alyp turý úshin, topyraǵyn qopsytamyz.
Tárbıeshi Mashamen birge gúlge sý quıyp, topyraǵyn qopsytyp kórsetedi.
Tárbıeshi: Masha, endi sen balalardyń jumysyn baqyla, qazir bárimiz bólme gúlderin otyrǵyzaıyq. Aldymen bárimiz aljapqysh taǵyp alaıyq, sodan soń aldymyzdaǵy topyraq salynyp turǵan ydysqa gúldi otyrǵyzyp sý quıamyz. Gúlderdi otyrǵyzý úshin onyń tamyry bolý kerek, muqıat tamyryn tekserip alaıyq, tamyry bolmasa gúl óse almaıdy. (Masha men balalar gúldi otyrǵyzady)
Tárbıeshi: Balalar Masha bizge gúl otyrǵyzýǵa kómekteskeni úshin ne aıtamyz?
Balalar: - Rahmet!
Tárbıeshi: - Jaraısyńdar! – Endi otyrǵyzǵan gúlimizdi tobymyzǵa aparyp, tereze aldyna qoıamyz. Gúlder kúnniń kózin jaqsy kóredi.
Jumbaq jasyrý:
Analarǵa syılaıtyn,
Aralar bal jınaıtyn
Bul nemene, balalar,
Úzýge adam qımaıtyn. (gúl)
Aısha
Qyzyl jasyl gúl egip,
Baptap, kúttik, túrlettik.
Qalmasyn dep qýaryp,
Apta saıyn sýardyq.
Gúldendirdik aýlany,
Aýlada gúl qaýlady.
Janıa 
Qulpyrǵan men raýshan gúlimin,
Japyraǵym jaıylǵan,
Sulýlyq bar boıymda
Tamyrym keń taraǵan.
Saıd Qazaqstan – bilip al,
Qyzǵaldaqtyń otany.
Qyzǵaldaqpen shyqty ǵoı,
Bizdiń eldiń ataǵy.
Masha:- Jaraısyńdar balalar! Sender óte baıqampaz balalar ekensińder. Endi gúldi qalaı ósirý kerek ekenin bildim.
Tárbıeshi: Saý bolyńyz! Myna gúldi sizge syılaımyz. Balalardyń sizge syılaǵan syıy, alǵysy retinde qabyl alyńyz.
Qorytyndylaý:
- Jaraısyńdar balalar! Búgin bizge kim keldi? Mashanyń gúli nege óspegen? Sender qandaı gúldermen tanystyńdar?
- Dala gúlderi, bólme gúlderi, emdik gúlderi.
- Qandaı dala gúlderin, bólme gúlderin, emdik gúlderin bilesińder?
- Gúlderdiń tústeri qandaı bolady?
- Ár tústi, qyzyl, sary, kók t. b.
- Japyraqtarynyń túsi qandaı?
Baǵalaý. Óte jaqsy, búgin barlyǵyńyz da óte jaqsy qatystyńyzdar!

Atyraý qalasy, "Zeınep, Amına jáne balapandar" bóbekjaı - balabaqshasy
Ortańǵy top tárbıeshisi: Balmýhanova Araılym Sansyzbaevna
Ashyq oqý qyzmeti. Jaratylystaný. "Gúlder"