InfoHub Logo

Astanada jeńil relsti kólik (LRT) synaqtary jalǵasýda. Alǵashqy vıdeolarmen birge áleýmettik jelilerde jańa kólik quralynyń shýy týraly pikirtalas týyndady. Qala turǵyndary jańa kólik qanshalyqty dybys shyǵaratynyn belsendi talqylaýda.

Bul týraly Infohub.kz aqparat agenttigi habarlaıdy.

«Kútkenimnen shýlyraq eken»

Threads jáne basqa da platformalardaǵy paıdalanýshylar qozǵalystaǵy poıyzdardyń beınejazbalaryn jarıalaıdy. Jeli qoldanýshylarynyń biri, LRT jelisine jaqyn jerde turatynyn aıtyp, bylaı dep jazdy: «Tynysh bolady dep oılaǵanmyn, biraq joq. Tereze jabyq bolsa, qalypty, al ashyq bolsa, poıyz ótkende baıqalady».

Mundaı jazbalar tez arada ondaǵan pikir jınaıdy. Keıbir pikirlerde «múldem estilmeıdi» dese, endi biri ony ushaqpen salystyrady.

«Kólikten de estiledi» jáne «Ushaq ushyp bara jatyr dep oıladym»

Paıdalanýshylardyń bir bóligi dybystyń qashyqtyqtan da seziletinin aıtady.

«Shynymen shýlaıdy, tipti kólikten de estiledi»,

«Jaqyndap ótip bara jatqanda, ushaq tómen ushyp bara jatyr ma dep oıladym».

Basqalary muny poıyzdyń saǵatyna 80 km/jyldamdyqpen júrýimen jáne dybys oqshaýlaǵyshy joq ashyq estakadalardyń dybysty kúsheıtýimen baılanystyrady.

«Bul fızıka: metaldyń metalǵa tıýi – dybys pen diril. Onyń ústine joldar ashyq, dybys qalqandary joq», – dep jazady pikir bildirýshiler.

«Jaqynda turamyn – múldem estilmeıdi»

Alaıda, qarama-qarsy pikirler de bar. Jeli boıyndaǵy úılerde turatyn keıbir turǵyndar dybys deńgeıiniń óte tómen ekenin aıtady.

«LRT deńgeıinde turamyn, terezeler týra jelige qaraıdy – ashyq terezemen áreń estiledi»,

«Tipti kóshede jaqyndap ótip bara jatqanda da, qatty dybys joq».

Olardyń aıtýynsha, dybys bar, biraq ol qalypty qala shýynan asyp ketpeıdi.

Operator ne deıdi?

Joba operatory CTS kompanıasynyń málimetinshe, ázirge turǵyndardan resmı shaǵym túspegen.

«Jobany júzege asyrý aıasynda dybys pen dirildi azaıtýǵa baǵyttalǵan sheshimder qoldanyldy. Júıe halyqaralyq standarttarǵa sáıkes keledi», – dep habarlady baspasóz qyzmeti.

Esterińizge sala keteıik, Astanadaǵy LRT jelisiniń synaq paıdalanýy bastalǵanyna alty aıdaı ýaqyt boldy. Astana ákimdiginiń habarlaýynsha, jobany júzege asyrý kestege saı júrip jatyr jáne jolaýshylar tasymalyn osy jyldyń kókteminde iske qosý josparlanǵan.