InfoHub Logo

Astanada múgedektigi bar balany top bolyp zorlady degen kúdikke alty adam ilindi

Astanada 2-top múgedektigi bar jasóspirimge qatysty jantúrshigerlik oqıǵa qoǵamnyń nazaryn aýdartty. Anasynyń aıtýynsha, balasyn birneshe adam birneshe ret zorlaǵan. Qylmystyq is qozǵalǵanymen, kúdiktiler áli bostandyqta júr.

Redaksıaǵa joldanǵan beınejazbada jábirlenýshiniń anasy ulynyń ınternet arqyly tanysqan birneshe adam tarapynan qorlyq kórgenin aıtyp, tergeýdiń baıaý júrip jatqanyn alǵa tartty.

«İsti bastapqyda Nura aýdanynda tirkedi, biraq ol jerde isti jabýǵa tyrysty. Biz Astana qalalyq polısıa departamentine berýge qol jetkizdik. Tergeý tórt aıdan beri júrip jatyr. Alty kúdiktiniń bári bostandyqta. Sot-medısınalyq saraptama zorlyqtyń bolǵanyn rastap tur. Ulym aýyr psıhologıalyq jaǵdaıda. Bala kezinen múgedektigi bar, endi oǵan qosymsha «epılepsıa» dıagnozy qoıyldy. Bul bolashaqta qalaı áser etetinin elestetý de qorqynyshty. Osyndaı aýyr soqqydan keıin men ınsýlt aldym», — dedi jábirlenýshi balanyń anasy.

Onyń aıtýynsha, balasy kúdiktilerdiń birimen onlaın oıyn arqyly tanysyp, keıin úıine barǵan. Sol jerde zorlyq-zombylyq oryn alǵan.

Astana qalalyq polısıa departamenti bul jaıtqa qatysty túsinikteme berdi:

«Atalǵan derek boıynsha qylmystyq is tirkelip, sotqa deıingi tergeý júrgizilýde. Birqatar sot saraptamalary taǵaıyndaldy. Qorytyndylarǵa sáıkes prosesýaldyq sheshim qabyldanady. Barlyq tergeý áreketteri zań aıasynda jáne qylmystyq proseske qatysýshylardyń quqyqtaryn saqtaı otyryp júrgizilip jatyr», — delingen resmı jaýapta.

Bul jaǵdaı qoǵamda úlken rezonans týdyrdy. Buǵan deıin de Túrkistan oblysynda múgedektigi bar jasóspirimdi aýyldastary birneshe jyl boıy zorlap kelgeni týraly aýyr oqıǵa habarlanǵan edi.

Qoǵam belsendileri men quqyq qorǵaýshylar osyndaı oqıǵalarda tergeý organdarynyń nemquraıly áreketin synǵa alyp, ádildik ornatýdy talap etýde.