InfoHub Logo

Astana qalasynda orta bilim beretin alty mektepte ájethanalarda sanıtarlyq normalar saqtalmaǵany anyqtaldy, dep elorda ákimdiginiń medıa ortalyǵy habarlaıdy.

Dúısenbide qalalyq bilim basqarmasynda qurylǵan jumys toby tekseris barysynda qaladaǵy keıbir mektepterdiń  oqý jyly bastalmaı turyp, aǵymdy jóndeý jumystaryn ýaqytynda aıaqtaýǵa úlgermegendigin anyqtady.

«Aǵymdaǵy jyldyń kóktemi men jazynda barlyq nysandar tekseristen ótip, anyqtalǵan eskertýler boıynsha aktiler jasalǵan bolatyn. Bilim berý mekemeleriniń tarapynan usynylǵan búdjettik ótinimderge sáıkes nysandardy aǵymdy jóndeýden ótkizý jumystaryna, sondaı-aq, 42 nysandaǵy sanıtarlyq toraptardy aýystyrý men jańartý sharalaryna qarajat qajetti kólemde bólingen-di», - dep habarlady qalalyq bilim basqarmasynan.

Joǵaryda kórsetilgen 42 nysannyń altaýynda búginge deıin ájethanalar qorshalmasa, 10 mekteptiń sanıtarlyq toraptaryndaǵy qorshaýlardyń esikteri ornatylmaǵan.

«Basqa nysandardaǵy sanıtarlyq toraptar talaptarǵa saı keledi. Joǵaryda atalǵannyń negizinde qysqy demalystyń aıaǵyna deıin normalardy buzý faktilerin durystaý boıynsha barlyq qajetti sharalar qoldanylatyn bolady», - dep málimdedi bilim basqarmasynan.

Budan bólek, jumys toby tekseris barysynda basqa da sanıtarlyq normalardyń buzylǵandyǵyn anyqtady. Máselen, keı mektepterde ájethanalarǵa jeke gıgıenalyq quraldar qoıylmaǵan.

Atalmysh mekemelerdiń jetekshileri tártiptik jaýapkershilikke tartylatyn bolady.

Esterińizge sala keteıik, taıaýda Facebook áleýmettik jelisinde elordanyń №7 gımnazıasyndaǵy ájethanalardyń sýretteri jarıalanǵan bolatyn. Sýrette áıelderge arnalǵan ájethanada aralyq qorshaýlardyń joqtyǵy kórinip tur.

Budan keıin Astana qalasy bilim basqarmasynyń basshysy Ánýar Janǵozın elordadaǵy barlyq mektepterdiń sanıtarlyq normalardy saqtaý-saqtamaýyn tekserýdi buıyrdy.

---