InfoHub Logo

Bilim jáne ǵylym mınıstri Ashat Aımaǵanbetov pedagogterdiń shamadan tys esep berý máselesin túbegeıli sheshetin buıryqtyń mańyzdylyǵy týraly aıtty.

«Men 2020 jylǵy 6 sáýirde qol qoıǵan № 130 buıryqta orta, tehnıkalyq jáne kásiptik bilim berý uıymdarynyń muǵalimderi toltyrýǵa mindetti qujattardyń naqty tizimi kórsetilgen. Bul qujattyń mańyzdylyǵy nede?

Budan bylaı muǵalimderdi shamadan tys esep berýden aryltatyn zań júzindegi negiz paıda boldy. Endi Mınıstrlik bekitken naqty tizim bar. «Pedagog mártebesi týraly» Zańǵa jáne Ákimshilik kodekske sáıkes, muǵalimderden bekitilgen tizimnen ózge qujattar boıynsha artyq esepti talap etkenderdi arnaıy organ aıyppul túrindegi ákimshilik jaýapqa tartýǵa bolady», - dep jazdy mınıstr óziniń áleýmettik jelidegi paraqshasynda.

Sondaı-aq, mınıstr atalǵan qujatty egjeı-tegjeıli túsindirdi.

«Endi pán muǵalimi kúndelikti eki qujatty toltyrady. Birinshisi — synyp jýrnaly, ekinshisi — sabaq jospary. Sondaı-aq oqý jylynyń basynda kúntizbelik-taqyryptyq jospardy daıyndaıdy jáne ár toqsan sońynda krıterıaldyq baǵalaý boıynsha qujattardy toltyrady. Qalǵan qujattyń esh qajeti joq.

Eger muǵalim jas pedagogtiń tálimgeri bolyp, sol úshin 17 myń teńgege jýyq ústemeaqy alatyn bolsa, onda jas áriptesimen birlesip atqarǵan jumysy boıynsha ádistemelik qujat toltyrady. Eger muǵalim synyp jetekshisi bolsa, onda oqý jylynyń basynda tárbıe jumysynyń josparyn jasaıdy, ótkizilgen ata-analar jınalysy boıynsha elektrondyq formatta hattama toltyrady, oqýshylardyń tabelderin toltyrady jáne qajettiligine qaraı olardyń jeke isterin jańartyp otyrady.

Mektep basshysy men basshynyń orynbasarlary toltyratyn mańyzdy qujattardyń da naqty tizimi belgilendi, artyq qujattyń esh qajeti joq.

Kolej pedagogteri toltyratyn qujattar tizimi de bekitildi. Olar jyldyń basynda jumys isteýge arnalǵan oqý baǵdarlamasyn quryp, kúntizbelik-taqyryptyq jospar jasaıdy, al kún saıyn sabaq josparyn ázirleıdi, teorıalyq, óndiristik oqytý jáne jeke sabaqtardy esepke alý jýrnaldaryn toltyrady. Eger pedagog kýratordyń qyzmetin atqarsa, taǵy bir qujat qosylady. Shamadan tys esep berý kórsetkishin túbegeıli azaıtýǵa qatysty naqty jumystar mektepke deıingi jáne joǵary bilim berý deńgeıleri boıynsha da júrgizilip jatyr. Joǵary oqý oryndarynyń oqytýshylary da qajetsiz qaǵaz júktemesinen arylady. Qazirgi ýaqytta BǴM tarapynan normatıvtik qujattarda kórsetilgen baqylaýdyń júrgizilýine qatysty toltyrylatyn qujattar tizimi qaıta qaralyp jatyr. Basym bóligin alyp tastaý týraly sheshim qabyldandy. Máselen, kafedranyń jumys jospary, komısıanyń hattamasy, qyzmettik oqý jospary syndy qujattar bizge qajet emes. Bul rette muǵalimderge artylǵan artyq júktemeni azaıtý boıynsha jaǵdaı jasap qana qoımaı, pedagogterden joǵary kásibı biliktilikti jáne sapaly bilim berýdi talap etetin bolamyz. Qoǵamda bilim berý sapasynyń nege aqsap turǵanyn túsindirý úshin, pedagogterdiń shamadan tys esep beretini, olardyń ózine tán emes jumystarǵa tartylýy, oqý baǵdarlamalary men oqýlyqtardaǵy olqylyqtar týraly jáne taǵy sol sıaqty máseleler aıtylady.

Biraq bul problemanyń barlyǵy sheshilip jatyr jáne budan bylaı da sheshimin taba beredi. Degenmen, bilim sapasy, eń aldymen, muǵalimderdiń biliktiligine tikeleı baılanysty. Sol sebepti, pedagog únemi ózin-ózi jetildirip, kásibı deńgeıin arttyryp otyrýy kerek», — dedi mınıstr.

---