InfoHub Logo

Dana halqymyz «Ata-anańa ne qylsań, aldyńa sol keler» degen. Ata-anaǵa  qurmet   kórsetý – asyl paryzymyz. Ata-ana – árbir adamnyń qaıtyp soǵar qazyǵy. Oǵan degen súıispenshilik tek júrekten shyǵýy tıis. Ásirese, meıirimniń káýsar bulaǵy – Ana esimine qatyssyz dúnıede eshteńe joq. Halqymyzdyń  uǵymynda balanyń ata-ana aldyndaǵy paryzyn óteýi «Ana sútin aqtaý» dep atalady. «Ákege baǵyný – táńirge baǵyný» dep ákeni de qadir tutqan. Endeshe adam ómiriniń máni men sulýlyǵy, adamnyń bolashaǵyna degen senimdiligi – balanyń ata-anasyn qadir tutyp, óziniń perzenttik paryzyn bir sátke de esinen shyǵarmaýynda jatyr.

Árqaısymyz úshin dúnıedegi eń qymbat jandar ata-anamyz bolýǵa tıis. Olardan jaqyn adamdar bul ómirde tabyla qoımas. Óıtkeni, olar bizdiń týǵan kezimizden bastap janymyzda júrip, qamqorlyq jasap,  qolyndaǵy baryn bizge beredi. Oǵan qosa balalarym ash, qatarynan qalmasyn dep «isheıin dep otyrǵan astaryn» bizderge saqtap otyratyny bárimizge belgili. Sondyqtan  ata-ananyń aldyndaǵy boryshty óteý óte qıynǵa túsedi  dep oılaımyn. Týǵan anamyzdy álemdegi musylmandar zıarat qylatyn Mekke,  Medınege úsh ret arqalap alyp barsaq ta, anamyzdyń aldyndaǵy boryshymyzdy aqtaı almaımyz,  anamyzdyń bizdi terbetip, bir tún uıyqtamaǵan kezindegi  boryshynan ǵana qutylady ekenbiz. Sebebi, olardyń bizge syılaǵan baǵa jetpes syıy – ómir. Sondyqtan, ata-anaǵa ne isteseń, aldyńa ózińniń balalaryńnan qaıtady. Dúnıe kezek degen osy. Biz ómir boıy jas bolyp turmaımyz. Biz ata-anamyzdy syılasaq, bizdiń balalarymyz da qartaıǵan shaǵymyzda ózimizdi kútip-baptap, baǵyp-qaǵatyn bolady.

Qazirgi kezdegi bolyp jatqan jaǵdaıǵa keletin bolsaq, qartaıyp, denelerinen kúsh-qaıraty ketken áke-sheshesin qarttar úıine tapsyryp, ár aı saıyn olardyń zeınetaqylaryn áketip jatqan qyz-jigitter az emes ekeni ras, bul kóńil qynjytarlyq nárse.

Ata-ana bizdi dúnıege ákeldi, al bizdiń qolymyzdan keletini sol ata-anamyzdy renjitpeı, árqashan olarǵa kómektesip, qamqorlyq jasap, qurmetteý ǵana. Olardyń bizge bergenin, bizdiń olarǵa beretinimizben salystyrýǵa bolmaıdy. Óıtkeni dúnıedegi eń qymbattysy – ómir. Al, olar bizge ómir syılaǵan jandar emes pe? Biz ony baǵalaı bilýimiz kerek. Mine, sol sebepti, biz ata-anamyzǵa barynsha qamqorlyq jasap, olardy qýantyp, renjitpeı  júrý – bizdiń paryzymyz.

Ata-anańa  qalaı  qurmet  kórsetseń, óz balańnan da solaı qurmet kórersiń. Óz balańyzdan  qandaı  jaqsylyq  kútseńiz, ata-anańyzǵa sondaı jaqsylyq isteńiz. Sebebi  ne berseńiz, sony alarsyz, ne ekseńiz, sony orarsyz. Jaqsylyq qylsań da  ózińe, jamandyq qylsań da ózińe emes pe?! Aq jaýlyqty, aq shashty óz  analarymyz  ben  danagóı   ákelerimizdi ardaqtaıyq, kóńilderine qaıaý, júrekterine  qaıǵy salmaıyq!

---