InfoHub Logo

Qaǵany – batyr, aqylgóıi kemeńger bolǵan eldiń baǵy janady.

Tonykók

Arman... Arman taýsylar ma?! Aty ańyzǵa aınalǵan Astanany kórýge qushtar edim... Igi jaqsylardyń arqasynda jazǵy kanıkýlda jol túsip, elimizdiń shańyraq qalasyna bardym. Ǵasyrlar toǵysynda juldyzy janǵan shahar kúlimdeı qarsy alyp, dem arasynda baýrap aldy. Dańqy alysqa jaıylǵan Báıterek jaqyndaǵan saıyn ajarlana tústi... Astanada bolǵan úsh kúnim ǵajaıyptarǵa toly tústeı boldy... «Bir kezderi «Arqalyq» atanǵan jazyq dalaly keń mekendi adam balasyn qanattandyrar, mynadaı kórikti shaharǵa aınaldyrý kimniń oıyna keldi eken?» dep oılaısyń. Iá, jaýabyn da bilesiń. Ol – ata-baba basynan ótken qıyn-qystaý kezeńderge qanyq, biligi men eńbekqorlyǵyn serik etken, talaı synǵa tóze bilgen, júregi «meniń elim, meniń jerim» dep jyrlaǵan Elbasynyń ıdeıasy, Elbasynyń erligi.

Biz táýelsizdik alǵanymyzǵa az ýaqyt ótse de, álem tańdaı qaǵyp, qyzyǵa qaraıtyn elmiz! Biz Týymyz kók aspanda jelbirep, Gımnimiz asqaqtaı oryndalyp, urpaǵy baqytty balalyq shaǵyn ótkizip jatqan elmiz! Bul – úlken qundylyq. Mundaı baqyt qalaı buıyrdy? «Altaý ala bolsa, aýyzdaǵy keter, tórteý túgel bolsa, tóbedegi keler» demekshi, bul baqytqa qol jetkizgen birligimiz ben kóregen saıasaty bar Elbasymyz dep oılaımyn.

San ǵasyr buryn «Tóbeńnen táńiri baspasa, astyńnan jer aıyrylmasa, Túrki halqy, el-jurtyńdy kim qorlaıdy?»-dep eljirep ótken Kúlteginniń, qazaqty bólek el etýdi kóksegen Kereı men Jánibektiń, úsh júzdiń basyn qosyp, bir tý astynda ajarlanǵan aıbyndy Abylaıdyń, halqyn ózgege taptatpaǵan Isataı men Mahambettiń, Uly Otan soǵysy tusynda halqy úshin janyn qıǵan Álıa men Mánshúk sıaqty ul-qyzdyń armany Táýelsizdik bolǵan edi...

1991 jyly Táýelsizdik baqytyna qol jetkizdik. Osy 28 jyl ishinde elim kóptegen asýlardan kórindi jáne onymen toqtap qalǵan emes. 130-daı ulttyń bir shańyraq astyna syıyp, tatý ómir súrýi – tarıhta bolmaǵan jaǵdaı... Keshegi álem deńgeıinde ótken «EKSPO» kórmesi kez kelgen elde óte bermeıtinin bilemiz... Eldi basqara biletin sheberligimen, kóregen saıasatymen tanylǵan Elbasynyń maqsaty qazaq elin damyǵan elder qataryna qosý edi. Bul maqsat jolynda jyl saıyn halqyn jarqyn bolashaqqa jeteleıtin joldaýlaryn usynyp otyrdy. Elbasy bir sózinde: «Maqsatqa jetý úshin bizdiń sanamyz isimizden ozyp, odan buryn jańǵyryp otyrýǵa tıis»-dep, rýhanı turǵydan sanamyzdy jańǵyrtý kerektigin atap kórsetti.

Jaqsy ustazdan úlgi kórgen Qasym-Jomart Kemeluly Toqaevty bıyl elimiz Prezıdent retinde tańdady. Azat elimniń jańa Prezıdenti de elin bıikten túsirmeı, asqaqtata berý maqsatynda túrli sharýalarǵa bilek sybana kirisip ketti. Halqym aıtqandaı, el bıleýshimizdiń aıy ońynan týǵaı...

Bilim salasyna engizip jatqan túrli ózgerister, sheteldiktermen tájirıbe almasý, latyn álipbıine kóshý – elimizdiń jarqyn bolashaǵy úshin jasalǵan qadamdar. Mundaı senimdi qadam basqan halyq qashanda bıik belesterdi baǵyndyratynyna senemin.

«Kóregen basshy eldi ósiredi, Kúshti maıdan erdi ósiredi» degendeı, Elbasynyń asqaq rýhy, qaıraty men aqyly, kóregendiligi, patrıottyq sezimi, maqsatshyldyǵy – men sıaqty qanaty qatpaǵan jas urpaqqa úlgi. Elim de, Elbasym da aman bolǵaı!

---