InfoHub Logo

Atyraý oblysy, Inder aýdany , Bódene aýylynda turatyn Keńes Sársenǵalıev balalar arasynda «kitaphanashy aǵaı» atanyp ketken. Ol kitaphanashylyq qyzmetke kelmes buryn birneshe jumys ornyn aýystyryp úlgergen dep jazady Aq jaıyq basylymy.

“Bastapqy jyldary aýyldaǵy mádenıet úıinde jumys istedim. Keıin dırektory boldym. Alaıda 1997 jyly mádenıet úıi jabylyp qalyp, jumyssyz qaldym. Odan soń aýyldyq okrýgte bas maman bolyp úsh jyl jumys jasadym, biraq qysqartýǵa ushyrap, taǵy jumystan bosap qaldym”, – deıdi ol.

Aýyldyq jerde jumysty tek mektepten, ákimdikten jáne ambýlatorıadan taba alasyń. Júzdegen adamnyń ishinen ol jerlerden jumys tabý biren-sarannyń ǵana mańdaıyna jazylady. Meıirbıke bolyp jumys jasaıtyn joldasynyń azǵantaı aılyǵy nege jetsin?

Keńestiń basqalardaı qala kezip, kásip izdeýge múmkindigi bolmady. Sol sebepti azǵantaı malyn baǵyp-qaǵýmen aınalysty. Al, 2011 jyly kitaphanashy jumys orny paıda bolyp, ol kitaphanaǵa jumysqa ornalasty.

"Kitaphanashynyń mindeti kitap úlestirýden turmaıdy. Ol sol kitapqa adamnyń qyzyǵýshylyǵyn oıata bilý kerek. 60-80-shi jyldary kitapty talasa oqıtyn. Qazir bala men úlkenniń qolynda planshet, telefon, kompúter. Bolmasa, úndi, túrik serıaldaryn úzbeı kóredi. Bar keregi men qyzyǵyn sodan tabady”, – deıdi Keńes.

Ol keıde kórkem ádebıetterdi arqalap, aýyl kezip ketedi. Zeınetkerlerge barady, kitabyn úlestiredi. Oqyp bolǵan soń jınap alady, basqasyn ákeledi. Aýyl qonaqasynda jańa kelgen kitaptyń mazmunyn qysqasha áńgimeleıdi. Kitaphanada bas qosyp, kitaptyń mazmunyn talqylaıdy. Qalaı etkende de kitapqumarlar sanyn arttyrýǵa tyrysýda.

Búginde kitaphana qorynda 10 745 kitap bar. Al oqyrmandar sany 500-diń ústinde. Jylyna 200-ge jýyq jańa kitap keledi. Onyń ishinde kórkem ádebıetten bastap poezıa, balalar kitaby bar.

"Kitap múldem eshkimdi qyzyqtyrmaıdy dep aıtýǵa bolmaıdy. Bizdiń jastaǵylar áli kórkem ádebıetten, klasıkalyq shyǵarmalardy oqýdan qol úzgen joq. Oqyrmannyń jartysy muǵalimder men oqýshylar. Ásirese, bastaýysh synyp balalary jıi keledi. Meni sol qýantady. Máselen, 9-shy synyp oqýshysy Alma Aımasheva bir jyl ishinde 70-ke jýyq kitap oqyp úlgerdi”, – deıdi kitaphanashy.

"Ras, tehnıka tez damyp keledi, qazir kez kelgen kitapty ınternetten taýyp, tyńdaýǵa da bolady. Biraq men paraqtardy aýdarystyryp, olardyń sybdyryn estigendi unatatyn jáne kitaptyń ıisin saǵynyp turatyn adamdardyń báribir bolatynyna senemin”, – deıdi ol.

---