InfoHub Logo

Qazirgi Qazaqstannyń aýmaǵynda atys qarýy Altyn orda dáýirinde paıda bolǵan. Bul týraly QR QK Ulttyq áskerı-patrıottyq ortalyǵynda «Altyn orda: Tarıh jáne mádenı mura» ǵylymı materıaldar jınaǵynyń tusaýkeserinde belgili boldy.

«Altyn orda dáýirinde Qazaqstannyń aýmaǵynda atys qarýy paıda bolǵanyn biri bilse, biri bilmes. Biz ony keıinirek paıda boldy dep oıladyq, al negizinde áskerı-tarıhı murajaıdaǵy jádigerler sol ýaqyttyń qazynaly áskerı-materıaldyq mádenıeti týraly syr shertedi», - dedi jınaqtyń jaýapty redaktory, tarıh ǵylymdarynyń doktory Aıbolat Kúshkimbaev. 

QR Qorǵanys mınıstrliginiń baspasóz qyzmetiniń habarlaýynsha, jınaqta jalpy tarıh boıynsha jumystardan basqa áskerı tarıh ta usynylǵan. Kitapta Hİİİ ǵasyrdan bastap HV ǵasyr aralyǵyndaǵy Altyn ordanyń áskerı tarıhy boıynsha materıaldar, zertteýler bar. Altyn orda dáýirindegi qarý-jaraq máseleleri, taktıka, strategıa, dáýirdiń keıbir áskerı-saıası oqıǵalary qaralady.

«Mońǵol ımperıasynyń tusynda 15-shi júz jyldyqqa deıingi bolashaq Altyn orda qalyptasty. Kórshilerin jaýlap alý qarýdyń kúshiniń arqasynda boldy. Jaýlap alýdyń fenomeni áskerı iste bolǵan tóńkerispen baılanysty. Biz úshin Altyn orda dáýirinde áskerı istiń damýy asa qyzyǵýshylyq týǵyzýda. Ol Shyńǵysqan dáýirindegi áskerı ónerdiń izbasary jáne kóshpeli halyqtyń áskerı isiniń barynsha damyǵan kezeńi. 13-15 ǵasyr biz úshin qantógisti, sheshýshi boldy. Jáne de áskerı ónerdi zerdeleý, áskerı isti, qarý-jaraqty damytý jaǵynan qyzyǵýshylyq týǵyzdy», - dep atap ótti Aıbolat Kúshkimbaev.

Altyn ordalyq áskerı-saıası kúsh eleýli geosaıası faktor bolǵanyn jáne halyqaralyq ómirde basty rólge ıe bolǵanyn aıta ketken jón.

QR Qorǵanys mınıstrliginiń baspasóz qyzmeti

---