InfoHub Logo

Atyraý oblysynda zeınetker erli-zaıyptylardyń ólimine qatysty tergeý jalǵasýda. Olardyń máıitteri óz úıleriniń aýlasynan tabylǵan. Bul oqıǵa qoǵamda úlken rezonans týdyrdy.

Bul týraly Infohub.kz aqparat agenttigi habarlaıdy.

Qylmystyń mán-jaıy

Erli-zaıyptylardy izdeý jumystary 6 qańtar kúni aıaqtalǵan. Týystarynyń aıtýynsha, máıitter óz úıleriniń aýlasyndaǵy saraıdan tabylǵan. Qaza bolǵan azamattyń ápkesi Farızat Kenjeǵalıeva qylmysker nemese qylmyskerler jerleý ornyn aldyn ala muqıat daıyndaǵanyn jetkizdi.

«Bul saraıdyń ishinde dıvan turǵan. Sol dıvannyń astynan meniń aǵam men onyń jubaıynyń máıitterin taptyq. İshinde shamamen 1,2–1,3 metr tereńdikte shuńqyr qazylǵan. Máıitterdiń ústine kıiz jabylyp, onyń ústine eki oryndyq dıvan qoıylǵan. Olardy men jalǵyz ózim tapqan joqpyn — búkil aýyl bolyp izdegendikten, bárimiz birge taptyq», – dedi Farızat.

Qylmys izderin jasyrý áreketteri

Týysynyń aıtýynsha, saraıda qylmys izderin jasyrýǵa áreket jasalǵany baıqalǵan, alaıda barlyq aıǵaqtardy tolyq joıý múmkin bolmaǵan.

«Kóptegen tekserýler júrgizildi. Sonyń nátıjesinde saraıdyń ishki qabyrǵalarynda shashyraǵan qan izderi bolǵany, olardy súrtýge tyrysqany anyqtaldy. Ol izder áreń baıqalatyn. Sonymen qatar lınoleýmge qanǵa sińip qalǵany kórindi. Munyń bárin tazalap, ústin kilemdermen jaýyp, jasyrýǵa tyrysqan», – deıdi ol.

Saraptama nátıjeleri

Vedomstvonyń baspasóz hatshysy Meıirim Erdáýlet saraptamanyń naqty derekterin málimdedi.

«Áleýmettik jelilerde túrli nusqalar, sonyń ishinde erli-zaıyptyny tunshyqtyrǵan degen boljamdar tarady. Qaza tapqandardyń denesinen pyshaq jaraqattary — shanshyp-kesilgen zaqymdar anyqtaldy. Máıitter sot-medısınalyq saraptamaǵa jiberildi. Saraptama barysynda jaraqattardyń naqty sany, ólimniń sebebi jáne qylmystyń naqty jasalǵan ýaqyty anyqtalatyn bolady», – dedi baspasóz hatshysy.