InfoHub Logo

Ol áskerı boryshyn Aýǵanda ótepti. Án salatyn. Aspapty baýyryna jıyp alǵan kúıi qunysa túsedi. Sonan soń áýeden áldebir dybystardy tyń tyńdaǵandaı kúı keshetini bar. Birde osylaı aspapta oınap otyryp, ony qabyrǵaǵa súıeı saldy da:

- Ol sharshap tur, - dedi.

- Mýzykalyq aspap ta sharshaıdy ma?

- Nege sharshamasyn? - dedi ol. - Muny aspaptyń qulaq kúıi kelmeı tur degenmen shatastyrýǵa bolmaıdy. Men onyń qulaq kúıin keltirdim. Biraq ol án salǵysy kelip turǵan joq. Demek, onyń kóńil kúıi bolmaı tur degen sóz. Sondyqtan oǵan tynyshtyq berý kerek.

- Soǵys degen qandaı bolady eken? - dep suraıdy odan.

- Soǵys degen zamanaqyr, - deıdi ol mundaıda. -  Zamanaqyr soǵys degen. Oǵan odan basqa qandaı teńeý oılap tabýǵa bolady?

- Maǵan túsiniksiz jaǵdaılar áskerden kelgennen keıin baryp oryn aldy, - deıdi ol. - Meniń kelý qurmetime úıde jurt qýanyshqa jınalǵan edi. "Myna jurt nege qýanyp jatyr? - deımin men. - Olar nege kúledi? Olar onda ne bolyp jatqanyn bilmeıdi ǵoı". Jigitter ıyqtan qaǵady. "Áý, oıansaıshy, jigitim! Munda qyzdar kelip jatyr ǵoı". Meni esh nárse qyzyqtyrmaı qaldy. Soǵystyń zardaby ǵoı, - deıdi ol.

Ol án salyp otyryp, ásirese, osy bir ándi jıi aıtatyn.

Ajaryń kóktemdegi ashyq tańdaı,
Janaryń túsken jandy jasytqandaı.
Jasyńnan jalyn shashyp jarq etkende
Qalady qandaı jigit ǵashyq bolmaı.

Ózin soldatpyn dep eseptedi. Sol sózdi maqtanysh tutty. Jáne ómirdegi ár er-azamat ózin soldat seziný kerek dep te aıta beretin.

---