InfoHub Logo

Kúıshi Soqyr Esjan jas kezinde kórshi aýyldaǵy bir baıdyń Aqbıkesh degen qyzyna ǵashyq bolady. Aqbıkesh te Esjandy unatqanymen eki jastyń qosylýyna áleýmettik jaǵdaı keselin tıgizedi. Aqbıkesh — óner ıesi, óz aýylyndaǵy belgili dombyrashylardyń biri. Ol Esjanmen oıyn-toıda kezdeskende bir-birine dombyramen ǵana syr shertisedi eken.

Arada eki jyl ótip, túrmeniń ýaqytyn bitirip, eline qaıtqan Esjan jolshybaı Aqbıkeshtiń aýylyna soǵady. Onda úlken toı bolyp jatady. Bul Aqbıkeshtiń uzatylar toıy ekenin Esjan bilmeıdi.

Esjan bir úıde jınalyp otyrǵan aýyl jastary men qarttarynyń ústine barady. Bular — «Aqbıkesh aýlymyzdaǵy on saýsaǵynan óneri tógilgen dombyrashymyz edi, endi ol bizden ketip, sizderge barǵaly otyr, eń bolmasa, sońǵy ret Aqbıkeshtiń tartqan kúıin tyńdap qalalyq, qyzymyzǵa ruqsat etińiz», — dep, qudalardan ruqsat alyp, ońasha úıde Aqbıkeshke kúı tarttyrý úshin jınalyp otyrǵandar eken.

Aqbıkesh biraz kúı tartyp, dombyrasyn tizesine súıep, qol oramalymen mańdaı terin súrtedi. Osy kezde Esjan da úıge kirip, bosaǵadan otyra ketedi. Aqbıkesh taǵy da kúı tartýǵa yńǵaılanyp, úıdegilerdi kózben bir sholyp ótkende esik aldynda otyrǵan Esjanǵa kózi túsedi. Esjannyń júdeý sıqyna qapalanyp, muńaıǵan Aqbıkesh:

— Kelesi kúı «Aınam qaldy» atalady, — dep dombyrasyn tarta beripti. Kúıdi berile tyńdap otyrǵandardyń biri:

— Myna dombyranyń úni shynynda da «aınam qaldy, aınam qaldy» dep qaqsap turǵan sıaqty. Osynshama kóp jasaý daıyndaǵanda qol ushyndaı aınany sandyqtyń buryshyna tastaı salýǵa bolmady ma eken? — deıdi janynda otyrǵan ekinshi bir kisiniń qulaǵyna sybyrlap.

Sonda Aqbıkeshtiń álgindegi qımylyn sezip qalǵan ekinshi qart:

— Joq, olaı bolmas. Menimshe, osy otyrǵandardyń ishinde Aqbıkeshtiń unatqan jigiti, aınasy qalyp bara jatqan bolar. Qyzdyń soǵan arnap, dombyramen aıtyp otyrǵan nazy shyǵar, — deıdi.

Shynynda da, bul kúı Aqbıkeshtiń Esjandy kórip muńaıyp tartqan, eskertkish esebindegi «Aınam qaldy» atty kúıi eken deıdi halyq arasynda.

---