AQSH vızasyn ala almaǵan túrkistandyq azamat Astanada alaıaqtyń qurbany boldy,dep habarlaıdy Infohub.kz tilshisi.

AQSH-qa barýdy armandaǵan 31 jastaǵy túrkistandyq Ǵalymjan Daırabaev vıza alý úshin 2,5 mıllıon teńgeden astam qarajatyn Astana turǵynyna bergen, alaıda sońynda aldanyp qalǵan. Ol istiń belgisiz sebeptermen jabylyp qalǵanyna jáne quqyq qorǵaý organdarynyń áreketsizdigine narazy.

Úsh ret vızaǵa qujat tapsyryp, nátıje bolmaǵan

Ǵalymjan buǵan deıin Ońtústik Koreıada jumys istegen, keıin eki jyldan soń Qazaqstanǵa oralǵan. AQSH-qa vıza alýǵa degen qulshynysy Gennadıı Golovkınniń jekpe-jegin kórý maqsatynan týǵan.

Alaıda ol úsh ret qujat tapsyrsa da, ártúrli sebeptermen vızadan bas tartylǵan:

1. Birinshi áreketi: Ol Koreıadaǵy tabysyn qoldanysta bolmaǵan kartasyna aýdarǵan, sondyqtan banktik esepshottaǵy kúmándi qozǵalys saldarynan vıza berilmegen.
2. Ekinshi áreketi: Týrısik agenttik "úılengen" dep kórsetse, vıza alý ońaıyraq bolady dep keńes bergen, biraq bul tásil de nátıje bermegen.
3. Úshinshi áreketi: Barlyq aqparatty shyndyqqa saı kórsetip tapsyrǵan, biraq taǵy da sátsizdikke ushyraǵan.

"Elshilikte tanystarym bar" degen áıelge 2,5 mln teńge bergen

Ǵalymjanǵa Astanada turatyn ápkesi kosmetolog bolyp jumys isteıtin bir áıeldiń vızany rásimdeýge kómektese alatynyn aıtqan. Kosmetolog ózin tájirıbeli maman retinde tanystyryp, elshilikte tanystary bar ekenin, tipti Koreıadaǵy deportasıa tiziminen shyǵaryp bere alatynyn ýáde etken.

Bul qyzmetteri úshin ol Ǵalymjannan 5 430 dollar (2,5 mln teńgeden astam) talap etken. Aqshany alǵan soń, bir jarym aı ishinde qujattyń daıyn bolatynyn aıtqan. Biraq birneshe aı ótse de, nátıje bolmaǵan.

Alaıaqtyń kinási dáleldense de, is jabyldy

Ǵalymjan 2024 jyldyń naýryzynan beri vızasyn kútip júrgen. Nátıje bolmaǵan soń, Astana qalasy Esil aýdandyq prokýratýrasyna aryzdanǵan.

Tergeý barysynda:

• Kosmetolog bastapqyda kinásin moıyndamaǵan, biraq aqsha aýdarymdary men habarlamalar kórsetilgen soń, Ǵalymjannan qarajat alǵanyn rastaǵan.
• Alaıaq áıel aqshany qaıtara almaıtynyn málimdegen.
• Prokýratýra bastapqyda istiń alaıaqtyq ekenin aıtqan, biraq keıin belgisiz sebeptermen qylmystyq is jabylǵan.

Ǵalymjan is alaıaq áıeldiń "tanystarynyń" kómegimen jabylyp tastaldy ma dep qaýiptenedi.

Quqyq qorǵaý organdary jaýap berýden bas tartty

Stan.kz tilshisi istiń qazirgi jaǵdaıyn bilý úshin Astana qalasy Esil aýdandyq polısıa departamentine suraý joldady. Alaıda polısıa:

• Tergeý derekteri jarıa etilmeıtinin,
• Eger bul tergeý múddesine qaıshy kelmese ǵana aqparat berilýi múmkin ekenin,
• İstiń ne sebepti jabylǵany týraly naqty jaýap bere almaıtyndaryn aıtty.

Osy máleni qozǵap,bizdiń de tilshiler jaýaptylarǵa saýal joldady,alaıda olar relaksıaǵa mardymdy jaýap qaıtarmady.

Ǵalymjan zańdy quqyqtarynyń taptalýyna narazy. Ol qolynda barlyq dálelder bola tura, ádildikke qol jetkize almaýyn túsine almaıdy.

Bul oqıǵa Qazaqstanda alaıaqtyq áreketterdiń kóbeıip, quqyq qorǵaý organdarynyń tıisti shara qoldanbaýy týraly suraqtardy qaıta kóterip otyr. Kinási dáleldengen adam jaýapkershilikten qutylyp kete ala ma? Qazaqstandyq quqyq qorǵaý júıesi alaıaqtyq áreketterdiń aldyn alýda qanshalyqty tıimdi? Bul suraqtar qoǵamda ózekti bolyp qala bermek.