InfoHub Logo

Tramp Ýkraınaǵa jańa qarjylaı kómek berýi múmkin
AQSH-tyń qazirgi prezıdenti Ýkraınany qoldaýdyń jańa joldaryn qarastyrýda

AQSH prezıdenti Donald Tramp Ýkraınaǵa birneshe mıllıard dollar kóleminde jańa qarjylaı kómek kórsetý múmkindigin qarastyryp jatyr. Bul týraly 13 shildede CBS News dıplomatıalyq derekkózderge silteme jasap habarlady. Basylymnyń jazýynsha, bul bastama Reseıge "aıqyn sıgnal berý" maqsatynda qolǵa alynýy múmkin. Sebebi sońǵy kúnderi Reseı drondar men zymyrandar arqyly Ýkraınaǵa birneshe soqqy jasaǵan.

Qarjynyń naqty kózi ázirge belgisiz. Degenmen, AQSH bıligi Tramptyń qolynda burynǵy prezıdent Djo Baıden tusynda bólingen, biraq tolyq ıgerilmegen 3,85 mıllıard dollar kóleminde rezerv bar ekenin habarlady. Bul qarajat amerıkalyq áskerı tehnıkany Ýkraınaǵa jiberý úshin paıdalanylýy múmkin.

Sonymen qatar, Tramp Reseıdiń sheteldik bankterde buǵattalǵan shamamen 5 mıllıard dollarlyq aktıvterin tárkilep, ony da Ýkraınaǵa baǵyttaýy yqtımal. Buǵan deıin bul quqyqty eshbir prezıdent – ne Tramptyń ózi, ne Baıden – paıdalanǵan joq.

Aıta keteıik, shilde basynda Pentagon Ýkraınaǵa keıbir qarý túrlerin jetkizýdi ýaqytsha toqtatqan edi. AQSH Qorǵanys mınıstri Pıt Hegset bul sheshimdi Aq úımen kelispeı qabyldaǵan. Al 10 shildede Tramp NBC arnasyna bergen suhbatynda Reseıge "qatty kóńili qalǵanyn" aıtyp, 14 shildede bul máselege qatysty mańyzdy málimdeme jasaıtynyn málimdedi.