InfoHub Logo

AQSH pen Eýroodaq jańa saýda kelisimine qol jetkizdi

AQSH pen Eýropalyq Odaq arasynda strategıalyq mańyzy bar jańa saýda kelisimi jasaldy. Bul jóninde AQSH prezıdenti Donald Tramp Shotlandıada ótken kezdesýde málimdedi. Kelissózder Eýrokomıssıa tóraǵasy Ýrsýla fon der Leıenmen ótti.

Tramptyń aıtýynsha, Eýroodaq aldaǵy ýaqytta AQSH-tan 750 mıllıard dollar kóleminde energıa resýrstaryn satyp alýǵa jáne 600 mıllıard dollar kóleminde ınvestısıa salýǵa kelisken. Sonymen qatar Brússel AQSH áskerı tehnıkasyna qomaqty qarjy jumsamaq.

Kelisim aıasynda Eýroodaq 1 tamyzdan bastap engizilýi múmkin bolǵan 30%-dyq keden salyǵynan qutylýǵa múmkindik alady. Óz kezeginde Brússel amerıkalyq eksportqa kedendik shekteýlerdi joıýǵa daıyn ekenin málimdedi. Iaǵnı, amerıkalyq taýarlarǵa keden salyǵy nólge deıin tómendetiledi.

Sonymen birge, AQSH EO-dan keletin keıbir ımport taýarlaryna, atap aıtqanda avtokólikterge 15% keden salyǵyn engizedi. Buǵan deıin bul kórsetkish 25% bolǵan. AQSH tarapy bul qadam arqyly saýda tepe-teńdigin saqtaýǵa múddeli ekenin jetkizdi.

AQSH-tyń saýda mınıstri Govard Lútnık ekijaqty kelisimge enbeı qalǵan keıbir salalar boıynsha jumys jalǵasyp jatqanyn aıtty. Atap aıtqanda, jartylaı ótkizgishter men dári-dármekterge qatysty kedendik máseleler aldaǵy eki apta ishinde sheshimin tabady dep kútilýde.

Aıta keteıik, buǵan deıin Bloomberg agenttigi EO tarapynan AQSH-tyń 30%-dyq tarıfine jaýap retinde qarsy sharalar daıyndalyp jatqanyn habarlaǵan bolatyn. Alaıda qol jetkizilgen jańa kelisim jaǵdaıdy ýshyqtyrmaı, ekijaqty ekonomıkalyq baılanystardy nyǵaıtýǵa jol ashty.

Tramp bul kelisimdi «AQSH tarıhyndaǵy eń aýqymdy saýda kelisimi» dep atady.