InfoHub Logo

Bákenniń keıde ótirik aıta salatyn da minezi bar edi. Biraq Bákenniń bul minezinen zıan kórip júrmin degen pende joq. Onyń ústine Bákenniń bul sózderiniń ózi de qıýlaspaıtyn, jobasy kelmeıtin sózder edi. Onysyn ile-shala Bákenniń ózi de moıyndap, "aıta salamyz ǵoı biz degen" dep ózi de kúlip otyratyny bar. Báken bul sózderdi bireýge zardap shektireıinshi, sodan paıda kóreıinshi degen oımen aıtpaıdy. Óziniń minezi sol. Degenmen Bákenniń osyndaı ańdaýsyz aıtyp qalǵan sózinen birde Bákeń zardap shegip qalypty. Bákeń degen Bákenderge qaraǵanda jasy úlken kisi ǵoı. Birde Bákeń aıaǵyna aýlanyń ishine ile shyqqan súıretpesin kıip alyp, úıiniń kóshe jaq betkeıindegi otyrǵyshta demalyp otyrady. Dál osy sátte kóshe boıymen taza kıimin kıip alǵan, eki qolyn qaltasyna salǵan kúıi Báken kele jatady. Báken jasy úlken Bákeńdi kórip sálem berý úshin burylady. Bákeńniń ózi balyqty jaqsy kóretin kisi me, álde jurttyń bári de balyqtan jasalǵan taǵamǵa ket ári emes pe, Bákeń dál osy turǵanda balyq týraly oılap otyrsa kerek. Bákenge suraqty berip kep qalady:

- Báken, balyq shyǵyp jatqan jerdi bilmeısiń be?

Osy jerde Báken óziniń kánigi minezine kóshedi.

- Kanalda sý tartylyp qalypty ǵoı, - deıdi Báken. - Jurt degen balyqty shanyshqymen alyp jatyr.

Mynany estigende Bákeńniń kózi jaınap ketedi:

- Onda baraıyq ta sol kanalǵa! Shanyshqymdy alyp shyǵaıyn!

Báken is osylaı nasyrǵa shaýyp keter dep oılamaǵan edi. Endi jaı ǵana aıta salyp edim dep aıta almaıdy. Sol jerde Bákeńniń janynan ketkenshe asyǵady.

- Men onda úıge baryp kıimimdi aýystyryp keleıin de, - deıdi Báken. - Myna taza kıimim búlinip qalyp júrer.

- Bar onda, tez baryp kel! - deıdi Bákeń Bákendi asyqtyryp. - Men shanyshqymdy daıyndap kútip otyra bereıin.

Báken sol ketkennen mol ketedi. Bákeń ony ári kútip, beri kútip, aqyry kelmegen soń, shanyshqysyn alyp, aýyl syrtyndaǵy kanalǵa aıaǵyndaǵy súıretpesimen-aq tartyp otyrady. Kanal basyna kelse, balyq aýlap júrgen adam joq. Kanal degen ıekten kelip sýǵa tolyp tur. Dál sol ýaqytta qas qylǵandaı jańbyr jaýyp ketedi. Al jańbyr jaýsa, kanaldyń basy aıaqqa jelimdeı jabysatyn saz batpaqqa aınalady. Bákeńniń aıaǵyndaǵy súıretpesi saz batpaqta qaıta-qaıta túsip qalyp, úıine áreń jetipti. Kelgenshe Bákendi túk qaldyrmaı sybap keledi. Endi Bákeń Bákenge renjip júredi. Bákeń Bákenge renjip júrse, Báken: "Áńgime bolsyn dep aıta salǵan sózge sene qalǵany nesi? Balyq shyǵyp jatsa, meniń ózim sol jerde otyratyn ba edim?" - dep, kerisinshe Bákeńe renjip júrgen kórinedi. Bákenniń sóziniń de qısyny bar. Bákenniń ózi de balyq dese, janyn beretin jandardyń biri ǵoı.

---