InfoHub Logo

Balýan Sholaq (1864-1916) (shyn aty-jóni — Nurmaǵanbet Baımyrzauly) — balýan, ánshi-sazger, san qyrly óner ıesi. Jas kezinde bir qolynyń bas barmaǵy úsip, sodan «sholaq» atanǵan. Kishkentaıynan atqumar ol nebir shý asaýlardy jalynan ustap, tyrp etkizbeı úıretken. At ústinde túregep turyp óner kórsetken. Teńge ilý, saıys, kókpar oıyndarynda aldyna jan salmaǵan.

Alyp kúsh ıesi Troısk qalasynda Reseıdiń ataqty balýany, dúnıe júziniń chempıony Ivan Korendi jyǵyp, qabyrǵasyn syndyrady. Osydan keıin onyń dańqy shyǵyp, kópshilikke taraıdy. Reseı jattyqtyrýshylary kásipqoı balýan bolasyń dep Orynbor, Sankt-Peterbýrg qalalaryna shaqyrady. Biraq júrgen jerinde toı-dýmanǵa úırengen, halqynyń erkesi bolǵan ol elin, jerin qımaı, bul usynystan bas tartady.
Kókshetaýda ótken oıazdyń sezinde elý bir put (qazirshe eseptesek, 816 kılogramm, bir tonnaǵa jýyq salmaq) girdiń tasyn kóterip, jınalǵan jurtty tań qaldyrady. Alyp kúsh ıesi Balýan Sholaqtyń osy girdiń tasyn kótergeni jáne Koren balýandy qalaı jyqqany týraly derekter óziniń shyǵarǵan óleńderinde kezdesedi.

Án-kúıge qumar Balýan Sholaq eki ónerdi qatar damytqan. Ol el aralap, saldyq qurǵan jáne jalǵyz júrmeı, mańyna ónerli jastardy (ánshi, kúıshi, balýan) jınaǵan. Ózi ustaz tutqan Birjan sal men Aqan seriniń ánderin oryndap qana qoımaı, halyq arasynda nasıhat júrgizgen.

---