InfoHub Logo

Qytaı ańyzy

Burynǵy zamanda qart kisi ólýge taıap qalǵan shaǵynda óziniń ulyn janyna shaqyryp alyp:

— Balam, men seniń keıin baqytty ómir súrýińdi qalaımyn,— depti.

Sol kezde uly: — Áke, men baqytty qalaı taba alamyn? — dep suraıdy.

Kári kisi: — Sen halyqtan baryp surap kór, halyq saǵan baqytty qalaı tabý kerek amalyn aıtyp beredi,— deıdi de ómirden ozady.

Ákesin jerlep bolǵan soń uly jolǵa shyǵady. Bir kúni ol ózen jaǵasyna kelip, bir attyń aqyryn júrip bara jatqanyn kóredi. Bul at ári kári, ári aryq eken. Qatty sharshaǵan at álgi jigitten:

— Áı, jas jigit, qaıda attanyp barasyń?— dep suraıdy.

Sonda jigit:

— Men baqyt izdeýge attanyp bara jatyrmyn,— dep jaýap beredi.

— Meni tyńda, jigit, men jas kezde tek shóp jeýdi, sý ishýdi ǵana biletinmin, esh nárseni de ýaıymdamaıtynmyn, adamdar meniń jem dorbama jem salatyn, sony jeýden basqa eshteńeni de bilmeıtinmin. Ol kezde men ózimdi dúnıedegi eń baqytty jan dep sezinetinmin. Biraq men qazir qartaıdym, eshkim meni kerek etpeıdi. Sondyqtan saǵan aıtarym, jas kezińde jastyq shaǵyndy qadirleı bil, men sıaqty bolma. Daıyn zatqa ǵana qumar bolmaı, barynsha eńbek qyl, eldi aıalaı bilip, el qýanyshymen birge qýana bil. Osylaı bolsa, sen baqytty bolasyń, —deıdi álgi at.

Jigit basyn ızep, óz jolymen kete berdi. Kele jatyp, jolda bir jylanǵa kezikti. Jylan odan: — Jas jigit, qaıda ketip barasyń? — dep suraıdy.

Jigit: — Men baqyt izdeýge ketip baramyn, — dep jaýap berdi.

Jylan: — Men saǵan aıtaıyn, buryn mende ý bolǵan kezde menen bári qorqady dep ózimdi órkókireksindim. Qazir eldiń bári meni jek kórip, óltirgisi keletinin túsindim. Sondyqtan men árdaıym elden tyǵylyp júremin. Sen de men sıaqtysyń, seniń aýzyńda da ý bar, tilińmen eldi jaraqattama, eger tynysh júrseń, osy ómirde eshkimnen de qoryqpaı, árqashan da erkindikpen ǵumyr keshesiń.

— Men seniń sózderińdi esimde saqtaımyn,— deıdi jas jigit.

Júre kele jas jigit bir aǵashty kóredi. Aǵashtyń ústinde kógildir tústi bir torǵaı otyr eken. Torǵaı: «Qaıda bara jatsyń, jigit?»— dep suraıdy.

— Men osy álemdegi baqytty izdep bara jatyrmyn, qaıdan tapsam bolady eken, bilesiń be?— deıdi.

— Ústi-basyń topyraq-topyraq, kıimiń jyrtyq, kóp jyldar boıy júrip kele jatqan sıaqtysyń. Seniń túriń ózgerip ketipti, endi adamdar senen qashatyn da boldy. Menińshe, sen baqytty taba almaıtyn sıaqtysyń. Men saǵan aıtaıyn, eger deneńdegi zattar árdaıym kórikti bolsa, aınalańda ásem bolady. Sol kezde-aq baqyt kelip seni izdeıdi, — dep sóz qatady.

Kishkentaı torǵaıdyń sózin estigen soń, jigit úıine keri qaıtypty. Ol tek eńbekqor, meıirimdi jáne ómirge kelgenine qýanǵan adamnyń janynda baqyt máńgi onymen bolatynyn túsinipti.

---