InfoHub Logo

Ertede Qarataý elinde Dospaı bolystyń Shaıan degen jylqyshysy bolady. Ol kezek sózge des bermeıtin ótkir tildi, ot aýyzdy shaǵyn ǵana kelgen kisi eken. Bolystyń alaly-qulaly toǵaı tolǵan jylqysyn bir ózi baǵatyn-dy.

Kún uzaq atqaqty bolyp sharshap kelgenine qaramastan ony Dospaıdyń áıelderi árnege jumsaı beripti. Shaıan alǵashqyda til alyp júrip, keıin: «pishen shap» dese, «bódeneden úrkemin», «otyn ákel» dese, «jylannan úrkemin», «sý ákel» dese, «qurbaqadan úrkemin» dep ár túrli syltaý aıta beretindi shyǵarady. Oǵan jurt: «Qoı emes, jylqy emes, adam úrke me eken?» dep senbeıdi.

Bir kúni Dospaı aýylynyń áıelderi jınalyp Shaıandy synamaq bop, qolyna sý tasıtyn qaýaq berip, sýǵa jumsaıdy.

Sonda Shaıan:

— Bir ózim barmaımyn, sýdaǵy qurbaqa, jylannan úrkemin, ózderiń ere júrińder? — deıdi.

Erikken áıelder:

— Osynyń úrikkeni qandaı bolar eken, kóreıikshi, — dep ózen jaǵasyna ere keledi.

Áıelderdiń sýǵa jumsaıtynyn kún buryn bilgen Shaıan óristegi jylqydan kele jatyp segiz órme buzaý tisti qamshy órimin qara laıǵa malyp sýat basyna jasyryp tastap ketedi.

Shaıan sý alatyn jerge áıelderden burynyraq kelip, qaýaqtardy bir-birine soǵystyryp, baýyna «qara shubar jylandy» ilip alady da, ústindegi shıdem shekpenin dáleńdetip, áıelderdiń aldynan taıdaı týlap, oınaqtap shyǵa keledi.

— Ne boldy? — degen áıelderge Shaıan:

— Kórmeısińder me jylannan úrkip kele jatqanymdy, — deıdi. «Jylandy» kórgen áıelder jaýlyqtaryn jelpildetip, shýlap úıge qaraı dúrkirep qashady.

— Eı, toqtańdar, toqtańdar! Men bolsam jylannan ǵoı úrkip kelemin, al senderge jol bolsyn?! — deıdi Shaıan.

Sol sol eken, sodan bylaı qaraı baıdyń áıelderi Shaıandy ony-munyǵa jumsamaıtyn bolypty.

---