InfoHub Logo

Qazaqstan ǵylymy men ádebıettaný salasyna ólsheýsiz úles qosqan kórnekti ǵalym, ádebıettanýshy, fólklortanýshy, Ulttyq Ǵylym akademıasynyń akademıgi, fılologıa ǵylymdarynyń doktory, Memlekettik syılyqtyń laýreaty Seıit Asqaruly Qasqabasov ómirden ozdy.

Seıit Qasqabasov 1940 jyly 24 maýsymda Semeı qalasynda dúnıege kelgen. Bala kúninen bilimge qushtar bolǵan ol 1964 jyly Abaı atyndaǵy Qazaq pedagogıka ınstıtýtyn úzdik támamdap, ǵylym jolyndaǵy saparyn bastady. Ǵalym óziniń eńbek jolynda túrli mańyzdy qyzmetterdi atqardy. Ol — Qazaqstan Mınıstrler Kabıneti janyndaǵy Joǵary attestasıa komısıasynyń tóraǵasy, L.N. Gýmılev atyndaǵy Eýrazıa ulttyq ýnıversıtetiniń shyǵystaný fakúltetiniń dekany, sondaı-aq Ulttyq Ǵylym akademıasynyń Ádebıet jáne óner ınstıtýtynyń dırektory qyzmetterinde jemisti eńbek etken.

Akademıktiń qazaq ádebıeti men halyq aýyz ádebıetin zertteýge qosqan úlesi orasan. Onyń ǵylymı murasy qazaq fólklory men halyq prozasynyń qyr-syryn ashyp kórsetýge baǵyttalǵan. Seıit Qasqabasovtyń qalamynan «Kazahskaıa volshebnaıa skazka», «Qazaqtyń halyq prozasy», «Kolybel ıskýsstva», «Kazahskaıa neskazochnaıa proza», «Abaı jáne fólklor», «Zolotaıa jıla», «Janazyq», «Qozy Kórpesh-Baıan Sulý. Qyz Jibek. Qazaqtyń ǵashyqtyq jyrlary» atty monografıalar men zertteýler dúnıege kelgen. Ol — 300-den astam ǵylymı eńbektiń, onyń ishinde 9 iri monografıanyń avtory.

Seıit Qasqabasovtyń eńbekteri qazaq halqynyń aýyz ádebıetin jańa qyrynan zerdeleýge, ulttyq mádenıettiń tamyryn tereń túsinýge jol ashty. Ol óz izbasarlaryna mol mura qaldyryp, ǵylym men ónerdiń damýyna súbeli úles qosty.

Belgili ǵalymnyń ómirden ótýi qazaq ǵylymy men rýhanıaty úshin orny tolmas aýyr qaza boldy.

Marqumnyń otbasy men jaqyndaryna Infohub.kz saıty atynan qaıǵyra kóńil aıtamyz.