InfoHub Logo

...Seıtek naǵashysy Dáýletıardyń syıǵa bergen ińgenshesine minip aýylyna qaıtqanda, jolshybaı janynda bir top shabarmandary bar Arsylankereı kezdesip, Seıtektiń astyndaǵy ińgensheni tartyp alady. Sony kek saqtap qalǵan Seıtek janyna Sahamandy ertip barymtaǵa attanady. Tóre Arsylankereıdiń jaıylysta júrgen bir úıir jylqysynan eki semiz atty alyp keledi de, ińgensheniń quny úshin dep kedeılerge soıyp beredi. Osyny syltaý etken tóreler endi Seıtektiń sońyna shyraq alyp túsedi.

«Ańdýshyny alýshy jeńedi» dep halyq aıtqandaı, izge túsken tóreler aqyry qalmaı júrip, Seıtekti qapylysta ustap, ordanyń túrmesine jabady. Biraq Seıtek túrmede kóp jatpaı qashyp shyǵady... Osy betimen úıine soqpastan Naryn qumyna ketedi. Edil boıyn, Qalmaq qyryn túgel aralaıdy, delingen edi.

Seıtek qalmaq jerinde júrgende bir úıge kelse, úıde bes qyz is tigip otyr eken. Biraq Seıtek bularǵa shóldep, sýsyn ishýge kelgenin aıtady. Sol kezde, otyrǵan qyzdardyń bireýi ornynan turyp, shalap bermekshi bolyp júre bergende Seıtektiń qolyndaǵy dombyrasyn kórip: «Siz bizge saz tartyp bermeseńiz, úıden shyǵarmaımyz», — dep qaljyńdaıdy. Mundaı qaljyńnyń talaıyn kórgen Seıtek, sýsynǵa qanyp alǵannan keıin, tamaǵyn kenep: «Eger sender bıleıtin bolsańdar, men saz tartaıyn», — deıdi.

Osyny estýi-aq muń eken, qyzdar oryndarynan ushyp turyp, bıleýge daıyndalady. Bul jaǵdaıdy kórgen Seıtek, kıiz qaptan dombyrany shyǵaryp alyp, bir kúıdi tartyp jiberedi. Kúıdiń ásem sazyna bes qyz urshyqtaı úıirilip bıleı jóneledi. Kúıdiń mýzykalyq úninde qalmaq sazyna jaqyn keletin elementter mol bolǵandyqta ba, áıteýir, osy bir kúıdiń sazy qyzdarǵa qatty unap qalady. Seıtek dombyrasyn quıqyljytyp, biraz tartyp-tartyp toqtaǵan kezde qyzdar Seıtekti ortaǵa alyp: «Bul ne degen kúı, aty qalaı?» — dep suraıdy. Aıaq astynan qoıylǵan mundaı saýalǵa birden ne derin bilmeı qalǵan Seıtek, sál kidiredi de: «Osy otyrǵan beseýińe arnaǵan «Bes qyz» atty kúıim bolsyn», — dep úıden shyǵyp ketedi...

---