InfoHub Logo

Qansha qıyndyq kórip, taýqymet tartsa da, Seıtek saly sýǵa ketetin jan emes-tin. Jasy alpysqa taıansa da boıynda kúshi mol, qaıratty, ájýalaǵysy kelgenderge aqysyn jibere qoımaıtyn. Osy sózimdi tirilteıik. Bir kúnderi Seıtektiń aýlyna aýzynda beıpil sóz, qolynda jalańdaǵan pyshaǵy bar, eldi úrkitip, qorqytyp bir esersoq jas jigit kele qalady. Seıtek bir dosynyń úıinde shaı iship otyrǵan. Babymen shaı iship, balqyp otyrǵanda bireý-mireý kelip mazasyn alsa, ondaı adamnyń sybaǵasyn beretin. Álgi jigit te úıge dál osyndaı sátte basa kóktep kirip kelip edi. Kóziniń eti ósken kórgensiz, kele «aljyǵan qaqbas» dep Seıtekti jerden alyp, jerge saldy. Seıtek áýeli úndemeı, jaıbaraqat shaıyn urttap otyra bergen. Jigittiń odan saıyn jyny keledi. Endi úıdegilerdi túgel sypyrtyp shyǵyp, shaı quıyp otyrǵan osy úıdiń kelini Shárıpaǵa tıise bergende, Seıtek aqyryn ǵana oǵan: «Qaraǵym, shaıyńdy ish, sýyp qaldy. Shamasy joq shaldar men áljýaz áıelderge urynyp ne qylasyń, óziń qaıratty bala kórinesiń, shyraǵym», — deıdi. Ur da jyq, alańǵasar jigit sóz astaryn túsine me, ornynan atyp turyp, «á, saıtan shal, sen maǵan aqyl úıretpekshimisiń?!» dep atasyndaı Seıtekke dúrse qoıa berip, pyshaq ala umtylǵan. Seıtek kóz ilespes shapshańdyqpen pyshaq ustaǵan qolyn shap berip, qaıyryp jiberedi de, pyshaǵyn julyp alady. Sosyn ákireńdegen nemeni aıaǵynyń astyna basyp otyryp, asyqpaı shaıyn ishe beredi. Shaıyn iship bolǵan soń Seıtek álgi jigitti turǵyzyp, bir nuqyp qalyp edi, qańbaqtaı ushyp baryp esiktiń arjaǵyna top ete tústi. Sol jatqannan ol tyrp etpeı biraz jatty. Júrgen jerinde jurttyń berekesin qashyryp, záresin ushyratyn jetesizdiń bul úıge de kirip kelip soıqan salmaq bolǵan túrin kórgende júregi tas tóbesine shyqqan Shárıpa onyń aq saıtanyn qaǵyp alǵan Seıtektiń erligine qaıran qap, alǵysyn bildiredi. Áıtse de, «dastarhannyń shyrqy buzylmasyn, tentek te bolsa qonaq qoı, shaı ishsin, ruqsat etińiz», — dep kelinshek Seıtekke qıyla tilek aıtty. Shárıpanyń myna aqyldyǵy men qaıyrymdylyǵyna rıza bolǵan kúıshi sol jerde Shárıpaǵa arnap bir kúı tartady. El arasyna da sol atpen tarap ketken.

---