Besikke bólengen sábı
Bala áýelde sábılerge arnalǵan tósekke jatqyzylǵan edi. Sonan soń bir kúni: "Osy bala tym erkinsip bara jatyr. Bul úlkeıgen saıyn aıtqanymyzdy qylmaıtyn bolady áli. Muny besikke bólep tastaý kerek" degen daýys estildi.
Balanyń júregi zyrq ete qaldy.
"Meni jazalaǵaly jatyr, - dedi bala. - Ózim de tym erkinsip ketip edim. Besik degenderi qandaı bolady eken?"
Sol kúni úıge besik alyp kelindi.
"Besik degenderi osy eken ǵoı, - dedi bala besikke qarap jatyp. - Myna kempiri kim taǵy?!"
"Jatpaımyn besikterińe! - dedi bala ishinen aıqaı salyp. - Kónbeımin buǵaýlaryńa! Shektemeńder erkindigimdi!"
"Myna kempirdiń bálesin-aı! - dedi bala. Aldy da besikke bólep tastady. Áje dep osylardy aıtady eken ǵoı. Al oınap kór ájelermen. Eregisse, alady da besikke bóleı salady".
"İshiniń jyp-jylysyn-aı! - dedi bala, - Kishkene myzǵyp alsam ba eken? Qara shaldardyń oılap tapqany-daǵy. Qara shaldardyń oılap taýyp júrgeni. Osy besikti qalaı taldan ıip jasasaq, urpaǵymyzdy da tárbıemizge solaı ıip kóndirip otyramyz degenderi. Betińmen jibermeımin dep besigińnen ses kórsetkendegisi".
"Bólep berdim, - degen kempirdiń daýysy shyqty. - Óziń terbet".
"Shesheme berip jatyr, - dedi bala. - Durys qoı endi. Balany kim tapsa, sol terbetsin degeni. Kári kisi sharshaıdy ǵoı".
"Álemniń tutqasy dep júrgenderiń osy, shyraǵym, - dedi taǵy da kempirdiń daýysy. - Álemniń budan artyq tutqasy degen bolmaıdy. Álemniń tutqasy dep júrgenderiń, sol - sábıińniń besigi".
"Durys aıtady, - dedi bala. - Álemniń tutqasy degen - bizbiz! Bizden mańyzdy kim bar?! - dep shirendi sábı".
Bala kózin ashyp aldy.
"Aý, myna kisi án salyp jatyr ǵoı! Meniń sheshem án salady eken ǵoı, ózi?! Aý, sheshe, aıtqan soń jóni túzý án aıtsańyzshy. Siz qazirgi qazaq estradasynyń repertýaryna túsip kettińiz ǵoı. Aıtqan soń baǵzynyń ánderin nege aıtpaısyz? Halyqtyń ánderine salsańyzshy. Aqyry qol-aıaǵymdy tas qylyp besikke bólep tastaǵan ekensińder".
"Osy ákem án sala ala ma eken? - dep oılady bala. - Shynynda da ákem án sala ma eken? Ózi tóbemnen tónip qarap turady. Saýsaqtaryn jybyrlatady. Meni soǵan kúledi dep oılaı ma? Oınatqansymaǵy-daǵy".
"Kúıtabaqty ózgertip jatyr, - dedi bala. - Sheshem kúıtabaqty aýystyryp jatyr. Halyqtyń ánine salyp jatyr".
Bólmeden jas kelinshektiń án salǵan daýysy estildi.
Taldan taıaq jas bala taıanbaıdy,
Bala búrkit túlkiden aıanbaıdy.
Ýgaı-áı...
Bala birte-birte maýjyrap uıyqtap bara jatty.
You Might Also Like
