InfoHub Logo

Úkimet otyrysynda QR Bilim jáne ǵylym mınıstrligi Erlan Saǵadıev bilim salasyndaǵy aqparattyq júıelerge jan-jaqty toqtaldy.

«Biz ózimizdiń aqparattyq júıelerdi biriktirýdemiz. Bizde 73 aqparattyq júıe bar, olardyń barlyǵy derekterdi 4 negizgi platformaǵa taratatyn bolady. Birinshi platforma - ulttyq bilim berý derekter bazasy, onda barlyq ákimshilik aqparat jınaqtalady. Ekinshi - elektrondy kúndelik. Onda oqýshylardyń úlgerimi, sabaq kestesi, josparlar, mektepter men texnıkalyq-kásiptik bilim berý mekemeleriniń akademıalyq aqparattary jınaqtalady», - dedi mınıstr.

Mınıstrliktiń engizip jatqan úshinshi platformasy - «bultty» býxgalterıa. Onyń aıasynda barlyq bilim berý nysandaryn bir ortalyqtandyratyn biryńǵaı býxgalterıa jasalmaq. Sońǵysy - joǵary bilimdi basqarýdyń biryńǵaı júıesi.

«Osy tórt platforma bir-birimen jáne ózge de memlekettik organdarmen aqparat almasyp otyrady. Bul salanyń tolyqtaı avtomatızasıasyna qol jetkizýge múmkindik beredi. Biz árbir oqýshynyń ár baǵasyn, úı tapsyrmasyn, oqytýshynyń árbir sabaqqa qatysty josparyn kóre alamyz. Ony BǴM, ákimdik, oblystyq bilim bólimi, ata-analar baqylap otyrady. Býxgalterıaǵa qatysty da solaı. Árbir mekteptiń árbir tıynyn ákimdik, oblystyq bilim bólimi, mekteptiń qamqorshylyq keńesi kórip otyrýy tıis. Qosymsha balalardyń quramyn, mekteptegi oryndardyń tapshylyǵyn, mektep qurylysy kartasyn qarap, baqylaýǵa jeńil bolady. Osynyń barlyǵy biryńǵaı júıede bolady», - dep atap ótti Saǵadıev.

Muǵalimderge bul júıe synyptardy onlaın basqarýǵa múmkindigi beredi.

«Qaǵazbastylyq, aqparatty qos-qostan jazýdyń qajettiligi bolmaıdy. Muǵalimniń barlyq mansap jolynda ótken attestasıalary jáne ózge de kásibı málimetteri oqytýshylardyń jeke kabınetinde saqtalady. Ustazdarǵa salynatyn aýyrtpalyq edáýir tómendeıdi. Baqytjan Ábiruly, eger Siz Ádilet, İshki ister dáne Densaýlyq saqtaý mınıstrlikteriniń málimetter bazasyn ortaq júıege júkteýge tapsyrma berseńiz, oqytýshylardyń úı-úıdi aralaýdy búgin toqtatýǵa daıynbyz. Bizde 100 myńnan astam oqytýshy jylyna eki márte barlyq aýlalardy aralaıdy. Mektepke barǵaly jatqan balalardy jazyp alady. Bul aqparattardyń barlyǵy bazada bolǵandyqtan, bul jumysty jasamaýǵa da bolar edi», - dedi ol.

«Ata-analarǵa aqparattyq júıe ne beredi!? Olar óz balalarynyń úlgerimin, árbir baǵasyn, mektepke kelýin, úı tapsyrmasyn, balanyń bilim qarqynyn onlaın rejımde baqylaı alady. Balanyń balabaqshadan bastap, PhD-ǵa deıingi barlyq málimetteri onyń jeke ID kabınetinde saqtaýly bolady», - dep tolyqtyrdy BǴM basshysy.

Onyń sózinshe, bul baǵyttaǵy jumystar bir jylda aıaqtalýy múmkin.

«7 myń mektepte ınternet bar, bul - shamamen eldegi barlyq mektepterdiń 90%-y. Degenmen onyń 2 myńynda ǵana joǵary jyldamdyqty ınternet ornatylǵan. Demek, bizge qalǵan mektepterge de joǵary jyldamdyqty ınternetti damytýymyz kerek», - dedi mınıstr.

Erlan Saǵadıevtiń málimeti boıynsha, ilki rejımde engizilip jatqan «Kúndelik» júıesin paıdalanatyn muǵalimder sany 174 myńnan asqan. Ony 1,4 mln. oqýshy, 854 myńnan astam ata-ana qoldanyp otyr.

---