InfoHub Logo

Qazaqstanda muǵalimderdiń kúshimen mektepke deıingi jasqa kelgen balalardy tirkeý maqsatynda júrgiziletin «sanaq» jumystary toqtatylady. Bul týraly búgin Úkimet otyrysynda QR Bilim jáne ǵylym mınıstri Erlan Saǵadıev málim etti.

«Baqytjan Ábiruly, eger Siz Ádilet, İshki ister dáne Densaýlyq saqtaý mınıstrlikteriniń málimetter bazasyn ortaq júıege júkteýge tapsyrma berseńiz, oqytýshylardyń úı-úıdi aralaýyn búgin toqtatýǵa daıynbyz. Bizde 100 myńnan astam oqytýshy jylyna eki márte barlyq aýlalardy aralaıdy. Mektepke barǵaly jatqan balalardy jazyp alady. Bul aqparattardyń barlyǵy bazada bolǵandyqtan, bul jumysty jasamaýǵa da bolar edi», - dedi ol Úkimet basshysyna qaratyp aıtqan sózinde.

Óz kezeginde, Saǵyntaev atalmysh máseleni barlyq mınıstrlikter birge talqylaı otyryp sheshýdi tapsyrdy.

«Bizde KSRO kezeńinen beri qalǵan bir dástúr bar, jyl saıyn muǵalimder kóshelerdi aralap, aýdan-aýdandy jaǵalaıtyn, árbir páterge, árbir úıge soǵatyn, sanaq júrgizetin. Endi ony jasap kerek emes», - dedi Úkimet otyrysynan keıin tilshiler suraǵyna jaýap bergen E. Saǵadıev.

BǴM basshysynyń aıtýynsha, atalmysh jumysqa muǵalimder bir aı ýaqyttaryn sarp etetin. 

«Jylyna eki ret úı-úıdi aralaý úshin bir aı ýaqyttaryn jumsaıdy. Olardy ıtter de qabady, túrli qaýipter oryn alatyn. Biz bul aýyrtpalyqtan muǵalimderdi bosatýdy josparlap otyrmyz», - dedi mınıstr. 

---