InfoHub Logo

 PISA-2018 nátıjeleri resmı túrde jarıalandy.

«Bul zertteý 15 jastaǵy bilim alýshylardyń oqý, matematıkalyq jáne jaratylystaný ǵylymy saýaty boıynsha daǵdylaryn baǵalaıdy. Osy baǵyttardyń bireýi ár 3 jyl saıyn negizgi baǵyt sanalady. Bul berilgen suraqtardyń jartysyna jýyǵy belgili bir baǵyt boıynsha basym bolatynyn bildiredi. PISA-2018-de PISA-2009-daǵydaı oqý saýattylyǵy basym baǵyt boldy. PISA testi oqýshylardyń akademıalyq bilimderin anyqtaýǵa emes, fýnksıonaldyq saýattylyqtaryn anyqtaýǵa, ıaǵnı, alǵan bilimderin qoldana bilýge, taldaýǵa, synı oılaýǵa baǵyttalǵan», — dep jazdy Asqat Aımaǵambetov Facebook paraqshasynda.

Sonymen, Qazaqstannyń nátıjelerine kelsek, eldiń PISA-2018-degi oqý saýaty boıynsha ortasha baly — 387, matematıkadan — 423 bal jáne jaratylystaný ǵylymy boıynsha — 397 bal.

«Bul ózimiz kútken kórsetkishter ekenin birden málimdeımin jáne olar EYDU boıynsha ortasha baldan tómen (EYDU boıynsha oqý — 487, matematıka — 489 jáne jaratylystaný — 489). Bizdiń PISA-2009 jáne 2012-degi nátıjelerimizben salystyrǵanda tómendeý baıqalady. Nátıjelerimiz PISA-2009-daǵydan oqý jáne jaratylystaný boıynsha 3 balǵa tómendese, matematıkadan, aıtarlyqtaı, 18 balǵa jaqsarǵan. Sońǵy ret oqý saýattylyǵy PISA-2009-da negizgi basym baǵyt bolǵandyqtan, salystyrýdy osy zertteý sıklimen júrgizemiz. Balalarymyzdyń nátıjesi tómendigine qaramastan asyǵys qorytyndy jasamaýǵa shaqyramyn, sebebi, bul nátıjelerdiń artynda birneshe faktor tur», — deıdi mınıstr.

Birinshiden, test Qazaqstan úshin alǵash ret kompúterlik formatta ótti. Bizdiń balalar úshin bul - alǵashqy tájirıbe. Testte ótken suraqtarǵa keri qaıtý múmkindigi bolmaǵanyn da eskergen jón. Qalyptasqan ádet boıynsha oqýshylar qıyn suraqtarǵa qaıta oralýǵa nemese óz jaýaptaryn qaıta qaraýǵa úırengen. Munda qaǵazdaǵy nusqamen salystyrǵanda, olaı jasaı almaıdy. Eger PISA-2015-tiń nátıjelerine qarasaq, onda 57 qatysýshy el alǵash ret kompúterde test tapsyryp, nátıjesinde kóptegen eldiń baly tómendegenin kórýge bolady. Mysaly, PISA zertteýi kóshbasshylarynyń biri Koreıanyń nátıjeleri matematıka boıynsha 30, jaratylystaný boıynsha 22 jáne oqýdan 18 balǵa tómendegen.

«Ekinshiden, PISA-daǵy nátıjelerdi jaqsarta alatyn bizdiń bilim berý júıesindegi ózgerister 15 jastaǵy bilim alýshylarǵa áli de áserin tıgizbedi (2002 jylǵy balalar). Óıtkeni, PISA-2018 qatysýshylary — jańartylǵan bilim berý mazmunyna kóshpegender. Jańartylǵan baǵdarlamalardyń áserin biz PISA-2021-den bastap kóre alamyz, al eń durysy — PISA-2024. Osy ýaqyt aralyǵynda PISA-2024 tapsyratyn bilim alýshylar jańartylǵan bilim mazmun boıynsha 7-8 jyl oqyp úlgeredi. Úshinshiden, zertteýge qatysqan qazaqstandyqtardyń negizgi bóligin 9 (44%) jáne 10-synyp (53,4%) oqýshylary qurady. Basqa elderde mektepke qabyldaý jasy naqty bekitilgendikten, tıisinshe, PISA qatysýshylarynyń kópshiligi bir paralelden boldy. Mysaly, Japonıa (100%) jáne Sıngapýr (90%) elderinen qatysýshylar - 10-synyp oqýshylary. Tórtinshiden, NZM nátıjeleri bilim berý baǵdarlamalarynyń tıimdiligin kórsetti. NZM oqýshylarynyń nátıjeleri oqý saýattylyǵynan 511 baldy, matematıkadan 554 jáne jaratylystanýdan 526 baldy qurady. Olardyń kórsetkishteri PISA-2018-degi kóshbasshy elderdiń nátıjelerine sáıkes», - dep jazady bilim vedomstvosynyń basshysy.

Bul — PISA-2018 qorytyndysy boıynsha alynǵan úlken taldaý materıalynyń bir bóligi ǵana. Mınıstrdiń sózinshe, qoıylǵan mindetterdi sheshý úshin qazirden bastap keshendi tásilderdi qarastyryp, sanaly túrde qatysý qajet. Derekterge negizdelgen túıindi qorytyndylar tolyq taldaýdan keıin ǵana jasalady. Nátıjeler «mekteptegi bilimge ózgerister qajet pe?» degen suraqqa taǵy bir márte oń jaýap berdi.

Kelesi zertteý 2016 jyldan bastap engizilgen oqý baǵdarlamalaryn jańartý boıynsha tańdalǵan strategıa tıimdi me degen suraqqa jaýap bere alady.

---