InfoHub Logo

Hovard kedeı otbasynan shyqqan bala edi. Mektepke kerek kitap-dápterin alý úshin kóshede júrip usaq-túıek zattar satatyn. Kúnderdiń birinde eshnárse sata almaıdy. Onyń ústine ábden shóldep, qarny ashady. Budan keıin bir úıdiń esigin qaǵyp, júrek jalǵaıtyn azyq suraýdy jón kóredi. Biraq esikti jas kelinshek ashady. Ol uıalǵannan:

- Keshirińiz, ishetin sý beresiz be? – dep suraıdy.

Jas kelinshek balanyń qarny ashyp qalǵan shyǵar dep úlken staqanǵa sút quıyp ákelip beredi. Bala sútti asyqpaı, ár jutymyn sińdire iship alyp:

- Kóp rahmet! Sút úshin sizge qansha qaryzbyn? – dep suraıdy.

- Eshqandaı qaryz emessiń! – dep kelinshek kúlimsirep:

- Anam kórsetken jaqsylyq pen jasaǵan kómegińnen aqy talap etpe dep úıretken bolatyn,- deıdi. Bala:

- Endeshe sizge taǵy da úlken rahmet aıtamyn! – dep ketip qalady.

Hovard Kellı ol úıden shyqqan kezde óziniń toıǵanyn ǵana emes, rýhanı jaǵynan áserlengenin de sezedi.

Aradan kóp jyldar ótedi. Álgi áıel sırek kezdesetin bir aýrýǵa shaldyǵady. Jergilikti dárigerler emdeı almaı, ony úlken qalaǵa jiberedi. Keńes berýge shaqyrylǵan dárigerdiń biri Hovard Kellı naýqastyń qaı jaqtan kelgenin estip, ony kórýge asyǵady. Bir kezderi ózine meıirimdilik tanytyp sút bergen áıeldi kórgen boıda birden tanyp, onyń ómiri úshin qolynan kelgendi aıanbaýǵa tyrysady.

Uzaq ýaqyt áıel em alyp jazylyp shyǵady. Aýrýhanadan shyǵar aldynda Doktor Kellıdiń aldyna áıeldiń esepshoty keledi. Ol ony tekserip, ústine bir nárseler jazyp, hatqa salyp naýqasqa berip jiberedi.

Áıel esepshotty alyp kórýge qorqyp dirildep turady. Sebebi onyń baǵasynyń qymbat ekenin, ómir boıy jumys isteý kerektigin oılap turady. Ne kerek hattyń ishin ashyp kóredi. Esepshottyń astyndaǵy jazýdy kórgen boıda ol kózine eriksiz jas alady. Óıtkeni ol jerde:

- «Emdelýge ketken shyǵyndar tolyǵymen bir staqan súttiń aqysyna tólendi»,- dep jazylǵan edi.  

---