InfoHub Logo

Túrkistan oblysyna qarasty Aqaltyn aýylynda ákim saılaýy ádiletsiz ótti dep sanaıtyn turǵyndar narazylyq tanytýda. Aýyl turǵyndarynyń aıtýynsha, ózderi qoldap otyrǵan úmitker saılaýǵa nebári eki kún qalǵanda túsiniksiz sebeppen kandıdattar qatarynan shyǵarylyp tastalǵan. Halyq muny jergilikti bıliktiń yqpalymen jasalǵan qysym dep qabyldaǵan.

— Biz ádil saılaý ótkizemiz deıdi, biraq shyn máninde bári aldyn ala sheshilip qoıǵan. Biz qoldaǵan azamatty saılaýǵa qatystyrmaı, burynǵy ákimdi taǵy ákele saldy, — deıdi aýyl aqsaqaldarynyń biri.

Sóz bolyp otyrǵan ákim — Serjan Bısenov. Ol osy aýyldy buryn da basqarǵan, biraq turǵyndar onyń jumysyna kóńilderi tolmaıtynyn ashyq aıtty. Aıtýlarynsha, Bısenovtiń ákimdigi kezinde ýáde etilgen jobalardyń basym bóligi oryndalmaǵan, aýyl ınfraqurylymy sol qalpy eleýsiz qalǵan.

— Bul joly óz tańdaýymyzdy jasaýǵa kedergi keltirildi. Bizge syrttan taǵaıyndalǵan emes, halyqpen birge jumys isteıtin basshy kerek, — deıdi narazy jurt.

Turǵyndar tıisti memlekettik organdardan bul jaǵdaıǵa naqty quqyqtyq baǵa berýdi suraıdy. Olar saılaý prosesiniń zańdylyǵyna qatysty tekserý júrgizilip, ádilet ornaýyn qalaıdy.