InfoHub Logo

Ortalyq komýnıkasıalar qyzmetine kelip, jýrnalıserdiń suraǵyna jaýap bergen Bilim jáne ǵylym vıse-mınıstri Elmıra Sýhbanberdıeva vedomstvonyń saıtyna shetelden DDOS shabýyly jasalǵanyn málim etti.

«Ótken senbiden jeksenbige qaraǵan túni Bilim jáne ǵylym mınıstrliginiń saıtyna DDOS shabýyly jasaldy. Saıt jumysy kelesi kúni qalpyna keltirildi. Aldyn ala málimet boıynsha, shabýyl sheteldik serverden jasalǵan. Osy kıbershabýyl aqparat quraldary men jelilerde jalǵan aqparat taratýmen qatar kelip otyr. Bul - bilim jáne ǵylym salalaryn damytý baǵdarlamasynyń bedelin túsirýge baǵyttalǵan qadam», - deıdi vıse-mınıstr.

Qazir mınıstrlik quzyretti organdarǵa sharalar qoldaný úshin júgingen. Al, vıse-mınıstrdiń aıtyp otyrǵan jalǵan aqparaty - «2009 jyly qabyldanǵan mamandyqtar klasıfıkatory ózgerdi» degen aqparat.

«Bilim jáne ǵylym mınıstrligi Prezıdenttiń tapsyrmalaryn iske asyrý úshin qajetti sharalardy qolǵa alyp jatyr. Alaıda sońǵy kúnderi aqparat quraldarynda, áleýmettik jelilerde jalǵan aqparat taratý jáne arandatý faktileri bolǵanyn bilesizder. Bul bilim jáne ǵylym salalaryn damytý baǵdarlamasynyń bedelin túsirýge baǵyttalǵan qadam. Mınıstr óz pikirin aıtyp, jarıalaǵanyn bilesizder. 2009 jyly qabyldanǵan mamandyqtar klasıfıkatory ózgergen joq. Qazaq tili men ádebıeti, tarıh, lıngvısıka, shyǵystaný mamandyqtary da óz ornynda. Eshteńe ózgergen joq, ózgermeıdi de. Bolashaqta jańa klasıfıkator daıyndalǵan jaǵdaıda da atalǵan mamandyqtardyń orny saqtalatyny týraly resmı túrde málimdegim keledi», - dedi vıse-mınıstr.

---