InfoHub Logo

Bir túlki toǵaıdy aralap kele jatyp, qalyń shalǵynnyń arasynda júrgen bódeneni ustap alypty. Úreıi ushqan bódene:

         – Túlkijan, tımeshi, ekeýimiz dos bolaıyq, – depti, qutylýdyń amalyn izdep.

         – Endeshe, meni toıǵyz, – depti túlki.

         – Onda er sońymnan, anaý qyzdarǵa baraıyq, – depti, bódene jańa qonyp jatqan bir aýylǵa erýlik alyp bara jatqan qyzdardy kórsetip. Ony kórip:

         – Al, basta! – deıdi de túlki sońynan ilesedi.

         Jaqyndaǵan soń bódene:

         – Men qyzdardy aldarqatyp alyp ketemin. Sen tamaǵyn jep al, – deıdi de ushyp baryp, qyzdardyń qarsy aldyna qonady. Qyzdar bódeneni qyzyqtap, ustap alǵylary keledi. Erýlikke arnalǵan tamaq toly tabaqtardy jerge qoıa-qoıa salyp, aqsańdaı qashqan bódeneni qýalasa jóneledi.

         Sol kezde túlki jetip baryp, tabaqqa bas qoıady. Etke sylqıa toıyp, tabaqtaryn tóńkerip, oınaqtap shyǵa keledi. Uzap baryp, bódene de ushyp ketedi.

         Qyzdar qaıtyp kelse, tabaqtary shashylyp jatyr eken, eti joq. Amalsyzdan aýyldaryna qaıtypty.

         Kelesi kúni túlki óziniń bódene dosyna taǵy kelip, ótinishin aıtypty:

         – Dosym, meni taǵy bir toıdyrshy...

         – Jaraıdy, toıdyraıyn. Meniń sońymnan iles te otyr, – depti bódene.

         – İleseıin, basta, – dep, túlki súmeńdep, bódeneniń sońynan erip, bir aýylǵa kelipti. Bódene túlkini aýyldyń syrt jaǵyna ilestirip alyp barady.

         – Sen osy jerde otyra tur. Men myna aýylǵa baraıyn. Meni kórgen soń, aýyl adamdary jabyla qýalaıdy. Men ár jerge bir qonyp, qashyqtata beremin. Sol kezde sen úı-úıge kirip, astaryn iship-jep, ábden toıyp al, – dep, aqyl úıretedi bódene.

         – Men qapy qalmaspyn! – dep, túlki aýyl syrtynda buǵyp jata beredi.

         Bódene aýylǵa kelip, «bytpyldyq, bytpyldyq!» dep, ushyp qonyp júredi. Ony kórgende, aýyldyń úlken-kishisi túgel óre turyp, jabyla kep qýyp beredi. Bódene ár jerge bir qonyp, birtindep uzaı beredi. Adamdardy alysqa alyp ketedi. Sol kezde túlki aýylǵa jetip barady da úı-úıge kirip, ázir tamaǵyn jep, qarnyn toıdyryp alyp, taıyp turady.

         Bódene oraǵyta ushyp kelip, bir qalyńda sholjıyp jatqan túlkiden:

         – Toıdyń ba, dosym? – dep suraıdy.

         Túlki tumsyǵyn kóterip:

         – Meniń qulaǵymnyń estimeıtinin bilmeýshi me ediń? Tumsyǵyma qonyp otyryp aıtshy, – depti.

         Bódene túlkiniń soraıyp turǵan tumsyǵyna qonyp alyp:

         – Toıdyń ba, dosym? – depti, qulaǵyna aıqaılap.

         Sol kezde túlki:

         – Toıdym, toıdym!.. – dep, tumsyǵynda qonyp otyrǵan ańqaý bódeneni qaqshyp ustap alyp, qylǵı salypty.

---