InfoHub Logo

Kól jaǵalap kele jatqan bir túlki sol mańda júrgen tyrnaǵa jolyǵyp, joldas bolypty. Bir kúni jaıylyp júrip, jaqyndap qalǵan soń túlkiniń inine kelip kiripti. Bulardyń izine ańshy túsken eken, ol da inge kelipti. Sonan soń endi eshqaıda ketpeısiń dep, túlki ininiń aýzyn qaza bastaıdy. Biraz tómenirek túsken soń, túbine erkin jetedi-aý degen kezde, inge shybyq salypty. Shybyq indegi túlki men tyrnanyń denelerine tıip, osqylap zyqysyn shyǵarǵan soń, tyrna búrisip otyrǵan túlkige:

         – Alpys amal túlkide, alpys eki amal adamda deýshi edi, sol amalyńnyń bireýin jasap, qutqarsańshy. Áıtpese, ólemiz! – depti. Sonda qalshyldaǵan túlki:

         – Amalym qurydy! – depti búrisip.

         Shybyqtyń qysymynan óletin bolǵan soń, tyrna bylaı depti:

         – Olaı bolsa, meniń bir amalym bar. Sony qoldanyp kóreıin. Sáti tússe, qutylyp ketermiz.

         – Onda sol amalyńdy tezirek iste! – depti, túlki sasqalaqtap. Tyrna óz amalynyń qalaı qoldanylatyn tásilin túlkige túsindire bastaıdy.

         – Men ólgen bop, inniń aýyz jaǵyna baryp jataıyn. Ańshy qolyn sozyp, meni sýyryp alady da seniń jemtigiń eken dep, ári qaraı tastaı salady. Sol kezde men tyraýlaı qıqýlap, usha jónelemin. Ańshy tańdanyp, jalt qaraıdy men jaqqa. Sol zamatta sen innen atqyp shyq ta zyta ber.

         Osyny aıtyp, tyrna inniń aýyz jaǵyna baryp jatady. Ańshy shybyǵyna eshteńe iline qoımaǵan soń, qolyn salypty. İshkerilete sozǵan eken, qolyna tyrna iligipti. Ańshy sýyryp alyp qarasa, moıny bylq-sylq etedi. Ólgen tyrna eken ǵoı dep art jaǵyna tastaı salypty. Sol kezde tyrna tyraýlaı jorǵalap, qıqýlaı usha jónelipti. Ańshy qap dep, artyna jalt burylǵan mezette túlki de innen atyp shyǵyp, qalyń butanyń arasyna qoıyp ketipti.

         Sóıtip, tyrnanyń tapqyrlyǵynyń arqasynda tyrna da, túlki de ańshynyń qolyna túspeı, aman qutylyp ketken eken.

---