InfoHub Logo

Burynǵy ýaqytta keń dalada júrgen alty túlki bas qosyp, joldas bolypty. Altaýynyń ishinde bir túlkiniń quıryǵy sholaq eken. Al uzyn quıryǵy bulańdaǵan bes túlki:

– Seniń quıryǵyń joq, sholaqsyń, – dep, kelekelep kúle beripti.

Olardyń bul qylyǵyna yzalanǵan sholaq túlki: «Osy maqtanshaq bes túlkini quıryqtarynan aıyryp, qalaı sholaq qylsam eken? Sonda menimen teńeser edi», – dep, kóp oılanypty.

Aqyry, bir amal tabady da álgi bes túlkige kelip:

– Qashanǵy buıyǵyp júre beremiz. Bir jaqsy oıyn oınaıyqshy, ishimiz pysty ǵoı, – dep, ótinish aıtypty.

– Oınasaq oınaıyq, sen basta, – depti, bes túlki kelisip. Sholaq túlki álgi maqtanshaq serikterin ertip, qalyń qaraǵaıdyń ishine alyp kelipti. Sodan keıin oıyn shartyn aıtyp, beseýiniń quıryǵyn bes qaraǵaıǵa myqtap tańyp tastaıdy da ózi bıik bir tóbeniń basyna shyǵyp turady. Basqa túlkiler ol habar bergenshe, kózderin jumyp turýǵa tıis bolady. Bir kezde sholaq túlki jan-jaǵyna abyrjı qarap:

– O, týysqandar, saqtanyńdar! Myna jaqta búrkit ustap, tazy ertken ańshylar kele jatyr! – dep, aıqaı salady da ózi belden ári asyp, qasha jóneledi.

Sol kezde qaraǵaıǵa tańýly turǵan bes túlki esi shyǵyp, tura qashpaq bolyp julqynǵanda, beseýiniń de quıryqtary julynyp, sholaq bolyp qalypty.

Ózderi ádemi quıryqtarynan aıyrylyp, sholaq bolǵan soń, serigin mazaqtaýdy qoıypty.

Sóıtip, sholaq túlki ózin kelekelegen bes túlkiniń desin basyp, ózine serik qyp alypty.

---