InfoHub Logo

«Bolashaq» halyqaralyq stıpendıasyn taǵaıyndaý úshin úmitkerlerdi irikteýdiń jańa erejesi bekitildi.

QR Úkimetiniń 2020 jylǵy 6 mamyrdaǵy №271 qaýlysymen «Bolashaq» halyqaralyq stıpendıasyn taǵaıyndaý úshin úmitkerlerdi irikteý jáne «Bolashaq» halyqaralyq stıpendıasyn jumsaý baǵyttaryn anyqtaý erejelerine ózgerister engizildi.

«Bolashaq» halyqaralyq stıpendıasyna úmitkerlerdi irikteýdiń jańa erejeleri barlyǵyna birdeı múmkindikter usynady. Barlyq kvotalyq sanattar alynyp tastalǵan. Bıyldan bastap «Bolashaq» stıpendıasynyń konkýrsyna aýyldyq eldimekenderden kelgen úmitkerlerdi qospaǵanda, jetekshi sheteldik joǵary oqý oryndarynan shartsyz shaqyrtýǵa ıe talapkerler ǵana qatysa alady», delingen habarlamada.

Ózgerister eń aldymen «Bolashaq» stıpendıasyna úmitkerlerdi konkýrstyq irikteý prosesine, sondaı-aq konkýrsqa qatysýdyń bastapqy talaptaryna qatysty.

«Konkýrstyq kezeń sany 6-dan 3-ke deıin qysqartyldy, atap aıtqanda ýájdemelik pen usynys hattardy baǵalaýdyń irikteý kezeńi, sonymen qatar memlekettik jáne shet tilin bilýge ​​arnalǵan kezeń alynyp tastaldy. Úmitkerler ózdiginen test tapsyryp, qujat ótkizgen kezde memlekettik tildi bilý týraly sertıfıkatyn usynýy kerek. Aýylan kelgen úmitkerler qosymsha shet tilin bilý týraly sertıfıkatty usynady», delingen habarlamada.

Memlekettik tildi bilý deńgeıin anyqtaýǵa arnalǵan synaq Ulttyq testileý ortalyǵynyń aımaqtyq fılıaldarynda ótkiziledi.

İrikteý kezeńderi mynalardy qamtıdy:

1-kezeń: Intellektýaldy qabilet deńgeıin, jeke jáne iskerlik qabiletin, shetelde oqýǵa psıhologıalyq daıyndyǵyn anyqtaıtyn keshendi test;

2-kezeń: Táýelsiz sarapshylar komısıasynyń múshelerimen jeke suhbat;

3-kezeń: Shetelde kadrlardy daıarlaý jónindegi respýblıkalyq komısıanyń otyrysy.

Aıta keterligi, jańa erejede aldyn-ala tildik oqytý alynyp tastaldy. Ol tek aýyldan kelgen talapkerler úshin saqtalady jáne 6 aı merzimi ishinde aǵylshyn tilin úırený Qazaqstan aýmaǵynda ótkiziledi.

«Bolashaq» stıpendıasyna úmitkerlerdi irikteýdiń jańa erejelerine sáıkes, aýyldyq eldi mekenderden qatysatyn úmitkerler tek sońǵy 3 jyl ishinde aýyldyq jerlerde turyp jáne onyń 2 jylyn jumys isteýge arnaǵan jaǵdaıda ǵana konkýrsqa qatysa alady.

Basymdyq berilgen mamandyqtar tizbesi eńbek naryǵy qajettiliginiń orta merzimdi boljamyn eskere otyryp, QR Bilim jáne ǵylym mınıstrligi jasaıdy», delingen habarlamada.

2020 jylǵa arnalǵan «Bolashaq» stıpendıasyn taǵaıyndaý konkýrsynyń jeńimpazdaryna usynynylatyn jetekshi sheteldik joǵary oqý oryndarynyń, sheteldik uıymdardyń jáne tildik kýrstar tiziminiń jobasy qazir kelisilip jatyr.

Álemniń jetekshi ýnıversıtetteri tiziminiń jobasy mynadaı halyqaralyq akademıalyq reıtıńter boıynsha anyqtalady: QS World University Rankings, Academic Ranking of World Universities, Times Higher Education World University Rankings, The U.S. News & World Report Best Global University Ranking.

Sonymen qatar, Táýelsiz sarapshylar komısıasynyń quramy men jumys reglamentine ózgeris engizilýde. Komısıa jumysyn qatań retteı otyryp, onyń ashyqtyǵyn barynsha kúsheıtý josparlanýda.

Aıta keterligi, «Bolashaq» halyqaralyq stıpendıasy QR Prezıdentiniń 1993 jylǵy 5 qarashadaǵy №1394 qaýlysymen bekitilgen. 26 ​​jyly ishinde baǵdarlama boıynsha 13 870 stıpendıa taǵaıyndaldy, onyń ishinde túrli salalarda 10 747 maman oqytyldy.

---