InfoHub Logo

Asan qaıǵy jelmaıasyna minip jeldirtip Saryarqany aralap júrgendegi jerge aıtqan syndary.

Uzyn aqqan Ertisti kórgende: «Myna shirkinniń balasy toıdym dep qarap otyrmas, qarnym ashty dep jylap otyrmas. Sıyrdyń múıizi, keýirdiń qulaǵy shyǵyp turǵan jer eken. Kúninde balasy keýirden jylaıdy-aý!» — depti.

Shyńǵys taýyn, Semeı taýlaryn kórgende: «Myna shirkinniń topyraǵy qutyrǵan eken. Oǵan shyqqan shóp qutyrady, ony jep semirgen mal qutyrady, onyń etin jep, sútin ishken adam qutyrady. Qan úzilmeıtin, kisi óltirý, urys-tóbeles kóp bolatuǵyn jer eken», — depti.

Túndik ózenin kórgende: «on eki qazylyq oı túndik, mańyrap jatqan qoı túndik, qoıdyń qulaǵy tutam shyǵyp turǵan jer eken», — dep, tastap ketýge qımaı artyna on qaraǵan eken. Sonan Qara atanǵan.

Qyzyltaý degen jerge kelgende taýy, tasy kesh bolǵanda qoı bolyp eńirenip jatady eken. «Toqtysy qysyr qalmaıtuǵyn jer eken» depti.

Baıanaýla taýyn kórgende: «At erin alýǵa jaramaıtuǵyn jer eken. Shirkindi jurt qalaı qonys qylyp otyrǵan. Bir kórgen kisi kápir-aı, seni jelkemniń shuqyry kórsin deıdi eken. Baýyrynda bir qara etken tuzy bar eken. Tuzy aýyr eken. Bir kún túnep ketemin degen bir juma toqtap qalady eken. Tuzy jibermeıdi eken».

Ashshy boıyna kelgende artyna qarap: «A, Baıanaýla, seniń qonys bolyp turǵanyń mynaý Ashynyń arqasy eken. Mal jazǵyturym bir juma ashylaıdy eken. Kúzge taman bir juma ashylaıdy eken. Sonysy bir jylǵa tatıdy eken. Olaı bolmaǵan Baıanaýla qonys bolýǵa jaramaıtuǵyn jer eken», — depti.

Bókeıbaı degen tóbeni kórgende: «Anaý Baıanaýla taýynan myna Bókembaıdyń qyryq keziktigi bar eken».

Terisaqqan degen ózendi kórgende: «Saryarqanyń tuzdyǵy eken» depti.

Jetiqońyrdy kórgende: «Saryarqanyń maýyty eken» depti.

Shý degen ózendi kórgende: «Myna shirkinniń eki jaǵy borbas eken, óne boıy nar qamys eken. İshi tolǵan jolbarys eken. Balanyń ishi qýyrylmaıtuǵyn, pyshaǵy sýyrylmaıtuǵyn, erkegi at bolatuǵyn, urǵashysy jat bolatuǵyn jer eken» depti.

Qarataýdy kórgende: «Kókekten basqa qusy joq, kók shópti julǵannan basqa isi joq. Aty bestisinde qartaıatuǵyn, jigiti jıyrmasynda qartaıatuǵyn jer azǵyny da munda eken, el azǵyny da munda eken» degen eken.

Shymkent, Saıramdy kórgende: «Eki bas sabyr, bazar malynda bereke bolmaıtuǵyn, bazary jaqyn — baıymas, mazary jaqyn — kóbeımes» degen eken.

Uzyn aqqan Syr boıyn kórgende: «Basy baıpaq, aıaǵy qaıqaq, eki-aq aýylǵa qonys eken. Ón boıy kedeılikke bitken jer eken».

«Qarataýdy jaılasa, Syrdyń boıyn qystasa, qonys bolýǵa sonda durys eken» depti.

---