InfoHub Logo

Gennadıı Golovkınniń qarsylastary onyń oısyrata uratyn soqqysyna tótep bere alatynyn jáne GGG-diń merziminen buryn jeńiske jetý úrdisi kezdeısoq jaǵdaı ekendigin jıi aıtady. Nazarlaryńyzǵa Golovkınniń qarsylastarynyń aıqasqa deıin onyń judyryqtasý stıli jaıly bildirgen pikirleri usynylyp otyr. Rıńge shyǵar aldynda ne dep pikir bildirgen edi, jáne kezdesý nátıjesinde nemen aıaqtaldy?

Denıel Gıl (26 shilde 2014 jyl):
— Golovkınniń bedeli maǵan úreı týdyrmaıdy. Osyǵan deıin oǵan ádeıi sondaı (álsiz) qarsylastardy tańdap ákelgen, sońǵy kezdesýleriniń erte aıaqtalyp júrýiniń sebebi de osyda. Solaı bolýy kerek bolǵan. Biraq, menimen bokstasý -  bul basqa deńgeı ekenin túsinińizder, men muny dáleldeımin. Joǵary deńgeıli boksshyǵa qarsy qandaı óner kórsete alatynyn kóreıik. 
Aıqas tehnıkalyq nokaýtpen 3-raýndta GGG-diń jeńisimen aıaqtaldy. 

Osýmaný Adama (1 aqpan 2014 jyl):
— Golovkın qaýipti jáne myqty boksshy. Biz bárimiz muny bilemiz. Ol árdaıym presıńtep, udaıy soqqylar jasap otyrady. Biraq men de myqty boksshymyn jáne eshkimnen qoryqpaımyn. Men oǵan erekshe birdeńe kórsetpekpin. Men ózime senimdimin. Golovkınmen judyryqtasý úshin boksshy bolýyń kerek. Qımyldaı otyryp, soqqy jasap otyrýyń kerek. Rıńde men dál osyny jasamaqpyn. Aıqasqa jasaǵan josparym osy. 
Golovkınmen aıqasta Adama 1, 6 jáne 7 raýndtarda nokdaýnda boldy. Keıin aıqas merziminen buryn aıaqtaldy. 

Kertıs Stıvens (2 qarasha 2013 jyl):
— Men aıqasqa demalý úshin baramyn, men onda kóńil kóterý úshin baramyn. Men onda istep júrgenimdi isteý úshin baramyn. Biraq ol basqa qarsylastarǵa kórsetip júrgen ónerin maǵan kórsete ala ma? Men judyryqtasyp, ony basyp tastaýǵa daıynmyn. Men jeńýge daıyn bolyp baramyn. 
Kezdesý tehnıkalyq nokaýtpen aıaqtaldy. Segizinshi raýndtan keıin referı aıqasty toqtatýǵa sheshim shyǵardy. 

Gabrıel Rosado (19 qańtar 2013 jyl):
— Men ony nokaýtqa jiberemin. 8-9 raýndqa jetpeı-aq! Meniń buǵan múmkindigim az dep oılaıdy. Biraq eger bizdi muqıat salystyrar bolsańyzdar, men ózgeshe boksshy ekenimdi baıqaısyzdar. Meniń tájirıbem joǵary. Onyń myqtylyǵy jaıly kóbi aıtady. Biraq meniń kúshime laıyqty baǵa bermeı júrgen syńaıly. Men de oısyrata soqqy jasaı alamyn. Nokaýtqa jibere alamyn. 
12 raýndtyq aıqasta Golovkın 7-raýndta tehnıkalyq nokaýtpen jeńdi. 

Gjegoj Proksa (1 qyrkúıek 2012 jyl):
— Golovkındi nokaýtqa jibere alatynyma kúmánim joq. Men búkil álemge ónerimdi kórsete alatyndaı múmkindik aldym jáne muny jiberip almas úshin barymdy salamyn. Qıyn aıqas kútip tur, biraq men jeńetinime senimdimin. 
5-raýndta tehnıkalyq nokaýtpen Golovkınniń jeńisi. 
Golovkınmen judyryqtasýǵa shyǵyp, jeńilis tapqannan keıin onyń myqtylyǵyn moıyndap, jeńilgenderin abyroımen kótergen sportshylardyń erligin atap ótpeske bolmaıdy. 

Marko Antonıo Rýbıo (19 qazan 2014 jyl):
— Men óz qarsylasymdy óte qurmetteımin. Ol myqty, qaıtalanbas boksshy ekenin bilemin, biraq men de qalyspaımyn. Men jankúıerlerime jeńis syılaǵym keledi, jáne olarǵa qyzyqty aıqas kórsete alatyndaı tájirıbem bar ekenin bilemin. Men jeńilis jaıly oılamaımyn. Men qurban bolmaı, jankúıerlerim men boks áleminiń syılastyǵyna kenelý úshin barymdy salamyn. 
Golovkın Rýbıony ekinshi raýndta nokaýtqa jiberdi. 

Davıd Leme (17 qazan 2015 jyl):
— Aıtqanymdaı, men myqtylardyń kez kelgenimen judyryqtasýǵa daıynmyn, al Golovkıin orta salmaqtaǵylardyń ishindegi eń myqtysy. Golovkın, bálkim, bokstaǵy úreı  týdyratyn adamdardyń biri shyǵar, biraq 17 qazan kúni orta salmaqta jańa úreı týdyratyn boksshy paıda bolady. Qan tógiledi, otshashý bolady, biraq bul aıqasta men jeńimpaz bolyp shyǵamyn. 
Gennadıı Golovkın 8-raýndta merziminen buryn jeńiske jetti. 

 

---