InfoHub Logo

QR Bilim jáne ǵylym mınıstrliginiń pedagogterdi jumysqa qabyldaý qaǵıdalaryna qatysty jańa buıryǵy QR Ádilet mınıstrliginde tirkeldi.

Bul jaıynda Bilim jáne ǵylym mınıstri Asqat Aımaǵambetov Facebook paraqshasynda jazdy.

«Endi pedagogterdi jumysqa qabyldaý jańa formatta konkýrs jáne naqty krıterııler boıynsha júzege asyrylady. Aıta ketken jón, atalǵan ózgerister muǵalimderdi jumysqa ornalastyrý kezinde ashyqtyqty qamtamasyz etýge, sybaılas jemqorlyq táýekelderin joıýǵa jáne jumysqa qabyldaý kezinde merıtokratıa qaǵıdalaryn qamtamasyz etýge baǵyttalǵan. Buǵan deıin naqty ereje bolǵan joq, ıaǵnı mektep dırektory kimdi jáne qandaı kórsetkishter boıynsha jumysqa qabyldaý kerektigi týraly ózi sheshetin. Birqatar aımaqta saǵattar sanyn durys bólmeı, úsh-tórt muǵalim bir stavkaǵa qabyldanǵan jaǵdaılar tirkeldi. Mundaı jaǵdaılar qandaı sebepterge baılanysty oryn alatynyn boljaý qıyn emes», - dep jazady mınıstr.

Onyń aıtýynsha, budan bylaı bilim berý uıymdary barlyq bos nemese ýaqytsha bos laýazymdarǵa konkýrs ótkizedi. Bul shaǵyn jınaqty mektepterge qatysty emes.

Baıqaýǵa biliktilik sıpattamalaryna sáıkes keletin muǵalimder qatysady.

«Endi tolyǵyraq atap óteıin. Jumysqa ornalasý kezinde úmitker konkýrsqa qatysý týraly ótinish beredi. Ótinish berýshi óziniń baǵalaý paraǵyn qosa usynady. Onda barlyq jetistigi, nátıjeleri, eńbek ótili, ákimshilik nemese ádistemelik qyzmet tájirıbesi, kýrstyq daıyndyq jáne basqa da aqparat kórsetiledi. Árbir baǵyt boıynsha kandıdat belgilengen krıterııler arqyly baǵalaý shkalasyna sáıkes óz baldaryn derbes qoıady.

Konkýrstyq komısıa ótinish berýshiniń ózi qoıǵan baldardyń, olardy rastaıtyn qujattardyń sáıkestigin tekserip, qorytyndy upaı shyǵarady. Nátıjesinde bos orynǵa eń kóp bal jınaǵan úmitker qabyldanady. Sýbektıvızm deńgeıi barynsha tómendeıdi.

Sonymen birge burynǵy jumys ornynan usynys hattar da suratylady. Úmitker oń usynys úshin 3 bal jınasa, al teris usynys úshin 5 bal joǵaltady.

Uıymdar úmitkerdiń qandaı da bir buzýshylyqtarǵa, onyń ishinde pedagogıkalyq etıka boıynsha buzýshylyqtarǵa jol berdi me, joq pa, sol týraly aqparatty eskere alady. Mundaı faktiler anyqtalsa, pedagog kez kelgen kezeńde konkýrstan shettetiledi.

Erejede úmitkerdiń biliktilik sanatynyń mindetti túrde bolýy qarastyrylǵan.

Endi joǵary oqý oryndary men kolej túlekterine jumysqa qabyldaný úshin dıplomnyń bolýy jetkiliksiz ekenin atap ótken jón. Olar Ulttyq biliktilik testileýden ótip, odan ári mektepte «pedagog» birinshi sanatyn alýǵa mindetti» dep túsindirdi mınıstr.

Pedagog qyzmetin negizgi jumysymen qosa atqaratyn muǵalimderdi bir pán boıynsha 8 saǵattan aspaıtyn júktememen konkýrssyz jumysqa qabyldaýǵa ruqsat etiletinin aıta ketken jón.

Sondaı-aq osy bilim berý uıymynyń muǵalimderi arasynda júktemesi 8 saǵattan az bos oryndardy úlestirýge bolady. Bul rette bir pán boıynsha bos 9 nemese odan da kóp saǵatty jasandy túrde bólshekteýge jol berilmeıdi.

Qabyldanǵan ereje pedagogtermen, sarapshylarmen, mektep dırektorlary jáne ádiskerlermen, bilim basqarmalarynyń basshylarymen jáne basqa da bilim berý uıymdarynyń ókilderimen talqylandy.

Atalǵan sharalar sybaılas jemqorlyq táýekelderin joıýǵa jáne pedagog laýazymyna úmitkerlerdi sapaly irikteýge baǵyttalǵan.

---