InfoHub Logo

Atyraý qalasynyń №2 sotynda burynǵy ákim orynbasary Baqytgúl Hamenovaǵa qatysty sot úkiminiń oryndalýyn keıinge qaldyrý merziminiń aıaqtalýyna baılanysty másele qaraldy. Buǵan deıin oǵan kishkentaı balasynyń bolýyna baılanysty úsh jylǵa merzim berilgen bolatyn.

Bul týraly Infohub.kz aqparat agenttigi habarlaıdy.

Probasıa qyzmetiniń málimetinshe, Hamenova qoǵamdyq tártipti buzbaǵan, ákimshilik jaýapkershilikke tartylmaǵan jáne bala tárbıesindegi mindetterin oryndaǵan. Osy jaǵdaılardy eskere otyryp, sot onyń ótinimin qanaǵattandyrdy. Jazanyń ótelmegen bóligi 7 jylǵa bas bostandyǵyn shekteý jáne sol merzimge probasıalyq baqylaýmen aýystyryldy.

Burynǵy úkim

2022 jyldyń 15 qarashasynda dál osy sot Hamenovany Qylmystyq kodekstiń 366-baby 3-bóliginiń 2-tarmaǵy boıynsha – para alǵany úshin kináli dep tanyp, 7 jylǵa bas bostandyǵynan aıyrý jáne memlekettik qyzmette qyzmet atqarý quqyǵynan ómir boıyna aıyrý jazasyn taǵaıyndaǵan edi. Alaıda, kishkentaı balasynyń bolýyna baılanysty jazany óteý merzimi úsh jylǵa keıinge qaldyrylǵan bolatyn.

Paranyń mólsheri

İs materıaldary boıynsha, bul Abaı Qunanbaevqa eskertkish ornatý jobasyn júzege asyrý kezinde 4,5 mıllıon teńge kóleminde para alý faktisine qatysty bolǵan. Sot múlikti tárkileý týraly da sheshim shyǵarǵan. Hamenova kinásin moıyndamady jáne úkimge shaǵymdandy, biraq ol ózgerissiz qaldy.

Buǵan deıin áleýmettik jelide onyń merekelik is-sharada túsirilgen vıdeosy taraǵan bolatyn. Bas prokýratýra bul jaǵdaıda eshqandaı zań buzýshylyq bolmaǵanyn, onyń probasıa qyzmetinen ruqsat alǵanyn túsindirdi.