InfoHub Logo

Ál-Farabı atyndaǵy QazUÝ Qazaqstannyń Birikken Ulttar Uıymyna múshe bolǵandyǵynyń 25-jyldyǵyn atap ótti. 1992 jyldyń 2 naýryzynda BUU Bas Assambleıasynyń 46-sessıasynda Qazaqstan álem elderiniń eń iri osy otbasyna biraýyzdan qabyldandy.

Bizdiń eldegi BUU-nyń Turaqty Úılestirýshisi Norımas Shımomýranyń atynan mereıtoılyq kúnge baılanysty quttyqtaý oqyldy. Quttyqtaý sózinde ókil respýblıkanyń barlyq mańyzdy halyqaralyq bastamalardyń belsendi qatysýshysy jáne memlekettiń ustanǵan baǵyty turaqty damýdyń maqsattaryna sáıkes ekendigin atap ótti. 

Ál-Farabı atyndaǵy QazUÝ Birinshi prorektory Muhambetqalı Búrkitbaev stýdentterdiń, oqytýshylardyń, qurmetti qonaqtardyń nazaryn eń bedeldi ámbebap halyqaralyq qurylym sanalatyn BUU róline aýdardy. Ýnıversıtet  BUU «Akademıalyq yqpal» Jahandyq Habyn jáne Ortalyq Azıadaǵy Turaqty damý boıynsha IýNESKO Aımaqtyq Habyn basqarady, IýNESKO-nyń jýrnalısıka jáne turaqty damý boıynsha eki kafedrasy jumys isteıdi. Ulttyq joǵary oqý orny jahandyq máselelerdi sheshý boıynsha halyqaralyq deńgeıdegi kóptegen bastamalar men aýqymdy jobalardy júzege asyrýda eń belsendi ári tıimdi alań bolyp tabylady.

Ýnıversıtettik saltanatty jıynnyń eń qurmetti qonaǵy QR syrtqy ister eks-mınıstri, BUU janyndaǵy Qazaqstan Respýblıkasynyń birinshi turaqty ókili, Tótenshe jáne Ókiletti Elshi, tarıh ǵylymdarynyń doktory, profesor Aqmaral Arystanbekova boldy. A.Arystanbekova el tarıhyna Prezıdent Nursultan Nazarbaevtyń tapsyrmasy boıynsha eldiń Birikken Ulttar Uıymyna kirý mindetin oryndaǵan tulǵa retinde endi. Osylaısha bizdiń respýblıkamyzdy álem moıyndady.

Aqmaral Haıdarqyzy 1991 jyldyń 16 jeltoqsanynan – Táýelsizdikti jarıalaǵannan bastap eldiń eń iri álemdik birlestik qataryna qabyldanýyna qatysty jumystardy kúndelikti belsendi túrde atqarǵany týraly aıtyp qana qoımaı, sol jyldardyń beınehronıkasy boıynsha kórsetti. Sol kezeńdi eske ala otyryp, BUU janyndaǵy Qazaqstan Respýblıkasynyń birinshi turaqty ókili jas táýelsiz memleketke qoldaý kórsetken áriptesterine, ásirese, sol ýaqytta óz qyzmetine kirisken Bas Hatshy Býtros Býtros-Galıge alǵysyn áli kúnge deıin bildiredi. Qazaqstannyń BUU quramyna engennen keıin týylǵan qazirgi stýdentterdiń kóbi Aqmaral Arystanbekovanyń BUU Bas assambleıasy trıbýnasynda alǵash sóz sóılegenin, BUU Nú-Iorktegi shtab-páterinde Qazaq SSR sol kezdegi qyzyl týynyń kóterilgenin kórip tarıhı oqıǵalardy bile aldy.  

1992 jyly Qazaqstan uıymnyń 168-shi múshesi boldy. Sonymen qatar, Aqmaral Haıdarqyzy ózi maqtan tutatyn QazMÝ hımıa fakúltetiniń túlegi. Ataýly kúnge oraı ol bizdiń elimizdiń BUU múshelikke kirý joly týraly jan-jaqty áńgimelep bergen «Stranısy ıstorıı» atty kitabyn jaryqqa shyǵardy. 

Búginde Qazaqstan – álemdik qaýymdastyqtyń belsendi múshesi. QR SİM Erekshe tapsyrmalar boıynsha elshi Maınýra Murzamadıeva óz baıandamasynda Prezıdent Nursultan Nazarbaevtyń BUU birneshe ret, atap aıtsaq, Bas assambleıanyń 50-shi jáne 70-shi sesıalarynda sóz sóılegenin aıtty. Qazaqstannyń usynǵan kóptegen bastamalary qoldaý taýyp, júzege asyrylýda. Biz 2017-2018 jylǵa BUU Qaýipsizdik keńesiniń turaqty emes múshesi boldyq, aldaǵy jyldyń qańtar aıy barysynda tóraǵalyq jasaıtyn bolamyz. Bizdiń elimizge ár jyldary BUU Bas hatshylary Býtros Býtros-Galı, Pan Gımýn, Antonıý Gýterrısh kelgen, al QR SİM qazirgi basshysy Qaırat Ábdirahmanov uzaq jyldar boıy BUU QR turaqty ókili bolǵan. Jańa kezeń – jasyl tehnologıalar boıynsha BUU ortalyǵyn qurý josparlanyp otyrǵan EXPO-2017 kórmesi aıasyndaǵy yntymaqtastyq.

Shırek ǵasyrlyq mereıtoıǵa qatysty sheteldik ókildikter tarapynan kóptegen quttyqtaýlar aıtyldy: Qazaqstandaǵy RF bas konsýly Alekseı Demınnen, AQSH bas konsýly Mark Mýdıden, Qyrǵyz Respýblıkasy bas konsýly Alıasbek Alymkýlovtan, QHR bas konsýly Chjan Veıden, Tájikstan Respýblıkasy bas konsýly Akram Akobırovtan, Ázirbaıjan Respýblıkasy bas konsýly Nızamı Rýstamovtan.

BUU qoǵamdyq aqparat departamentiniń dırektory Vlastımıl Samek halyqaralyq uıymnyń barlyq qurylymdary men ınstıtýttarynyń qyzmeti jer sharyndaǵy seriktestikti nyǵaıtýǵa, qaýipsizdikti kúsheıtýge baǵyttalǵanyn basa aıtty.

Ýnıversıtet stýdentteri BUU resmı alty tilinde jáne memlekettik tilde barlyǵyn aıtýly mereıtoımen quttyqtady. Qonaqtar BUU 70-jyldyǵyna arnalǵan fotokórmeni qyzyǵýshylyqpen kórip shyqty. 

 

Ál-Farabı at. QazUÝ

Stýdenttik baspasóz Ortalyǵy

---