InfoHub Logo

Bıyl Qyzylorda oblysynda 6570 oqýshy  mektep bitirgeli otyr. Onyń 4574-i, ıaǵnı 70 paıyzy Ulttyq biryńǵaı test tapsyrady.

Bul týraly búgin apparat májilisinde aıtyldy, dep habarlady oblystyq ákimdiktiń baspasóz qyzmetinen.

Synaq tapsyrýǵa nıet bildirgenderdiń basym bóligi jaratylystaný-matematıkalyq baǵyt boıynsha mamandyqtardy tańdaýda. Aıta keteıik, 37 mektep bitirýshi Reseı, Grýzıa, Qazaqstan, Ońtústik Koreıa memleketterinde halyqaralyq ǵylymı jobany qorǵaý arqyly   memlekettik oqý granttaryn aldyn ala jeńip aldy. Bul mektep bitirýshiler mınıstrliktiń buıryǵy negizinde UBT-den bosatylatyn bolady.

Oblysta 9 UBT ótkizý pýnkti jumys jasaıdy. Jeteýi aýdan ortalyqtarynda, ekeýi Qyzylorda qalasynda ornalasqan. Olardyń barlyǵy da Ereje talaptaryna sáıkes jabdyqtalýda. Mektep bitirýshiler aı saıyn 2-3 retten UBT ótkizý pýnktinde jáne mekteptiń bazasynda aıyna 4 retten synama test tapsyrýda. Synama test qorytyndylary ata-analarmen birge taldanyp, tómen bolǵan jaǵdaıda daıyndyqty kúsheıtý, jaqsartý sharalary qarastyrylyp keledi. Búgingi kúngi synama test boıynsha oblystyń ortasha baly 88,3-ti qurap otyr. «Altyn belgige» - 352, «Úzdik atestatqa» 135 oqýshy úmitker.

Aral aýdanyndaǵy «Qambash», Jańaqorǵan aýdanyndaǵy  «Taldysý» qosymsha bilim berý ortalyqtary men Syrdarıa aýdanyndaǵy «Jalyn», Jańaqorǵan aýdanynyń «Taý samaly» oqýshylar tynyǵý lageriniń bazasynda 3108 túlek daıyndyq kýrsynan ótti. Oǵan 76 mln 756 myń teńge qarjy qarastyrylǵan. Mektep bitirýshilerdiń az qamtylǵan otbasy balalary úshin synama test kitapshalaryn satyp alýlaryna jergilikti búdjet esebinen  22 mln teńge bólindi.

- Men sońǵy bir apta ishinde barlyq aýdandarda bolyp, ustazdar men mektep bitirýshi túlektermen kezdesip, pikirlestim. Oqýshylardyń kóńil-kúıi kóterińki. Endigi maqsat - jaýapty mekemeler balalardy tasymaldaý, tamaqtandyrý men qaýipsizdik jáne test tapsyratyn oryndardyń 100 paıyz daıyndyǵyn qamtamasyz etý. Sonymen qatar, psıhologtar túlektermen jumysty kúsheıtýi tıis, - dedi oblys ákimi Qyrymbek Kósherbaev.

---