Depýtat: Joǵary synyp oqýshylary arnaıy áskerı forma satyp alýǵa májbúr
Joǵary synyp oqýshylary qazir alǵashqy áskerı daıyndyq sabaǵynda kıetin arnaıy forma satyp alýǵa májbúr. Ata-analar osy talapqa tyıym salýdy surap otyr. Búgin Májilistiń jalpy otyrysynda depýtat Aıqyn Qońyrov osy máseleni kóterdi, dep habarlaıdy Baq.kz tilshisi.
«Mektep formasy Bilim jáne ǵylym mınıstriniń 2016 jylǵy 14 qańtardaǵy buıryǵymen reglamentteledi. Orta bilim uıymdary úshin mindetti mektep formasyna qoıylatyn talaptarǵa sáıkes ol kúndelikti, merekelik jáne sporttyq bolyp bólinedi. 10,11 synyp oqýshylaryna arnalǵan alǵashqy áskerı daıyndyq baǵdarlamasynda balalar sabaqqa uqypty kıinip kelýi tıis dep jazylǵan. Oqytýshy sabaq bastalǵansha vzvodtyń jeke quramy nemese oqý tobyna kıim formasy qandaı bolýy qajettigin aıtýy kerek. Osylaısha, oqytýshy-uıymdastyrýshy oqýshylardyń sabaqqa qandaı kıimmen kelýin ózi anyqtaıdy. Sóıtip, qazir kamýfláj kostúmi, bas kıim, aıaq kıim jáne aq tústi jaǵa astary jıyntyǵyn alý talaby qoıylǵan», - deıdi A.Qońyrov.
Depýtattyń aıtýynsha, 10,11 synyp oqýshylary jáne kolejdiń 1,2 kýrs stýdentteriniń ata-analary alǵashqy áskerı daıyndyq sabaǵyna arnaıy áskerı kıim alý talabyna shaǵymdanyp otyr. Óıtkeni, arnaıy áskerı kıim alýǵa 20-30 myń teńge qajet. Endi ata-analar kún sýyǵasyn, qysqy kıim alý kerek bolady dep alańdap otyr. Al onyń baǵasy áldeqaıda qymbat.
«Bul rette barlyq orta bilim uıymdary Bilim jáne ǵylym mınıstriniń mindetti mektep formasy týraly buıyryǵyn qatań saqtaýy qajet dep esepteımiz. Alǵashqy áskerı daıyndyq sabaǵy úshin arnaıy forma alý talabyna tyıym salyp, bul sabaqta kúndelikti nemese sporttyq formany kıýge ruqsat berý qajet nemese Qorǵanys mınıstrligi esebinen oqýshylardy arnaıy áskerı formamen qamtamasyz etý kerek»., - deıdi depýtat.
You Might Also Like
-
1 qyrkúıek kúni Ombydaǵy №130 orta mektebinde Qazaq tilin oqytý ortalyǵynyń tusaýkeseri ótti. Bul - oblysta sońǵy eki jylda ashylǵan jetinshi ortalyq. Qazaq tilin oqyp-úırengisi keleti...
