InfoHub Logo

Qyrǵyzstan prezıdenti Sadyr Japarov Kamchybek Tashıevtiń memlekettik qyzmetten ne sebepti bosatylǵany týraly pikirin bildirdi. Bul týraly Infohub.kz aqparat agenttigi habarlaıdy.

«Qyzmetinen bosatylmaı turyp, men dosyma habarlasyp, jaǵdaıdy túsindirdim. Odan keıin ony qyzmetinen bosatý týraly sheshim qabyldadym», - dedi Japarov «Kabar» agenttigine bergen suhbatynda.

Dosyn durys joldan taıdyrǵandar

Prezıdenttiń aıtýynsha, bul sheshimmen ol óziniń dosyn kerisinshe qorǵap qalǵan. Sebebi, Tashıevtiń janynda júrgen keıbir adamdar ony «durys joldan taıdyrǵan».

«Olar Kamchybek Tashıevtiń atyn jamylyp, parlament depýtattaryna, jaýapty memlekettik qyzmetkerlerge jáne qoǵamdaǵy beldi tulǵalarǵa «Generaldyń jaǵyna shyǵyńdar» dep júgine bastaǵan», - dep qosty Japarov.

Memlekettiń turaqtylyǵy bárinen mańyzdy

Memleket basshysy eger Tashıevti qyzmetinen almaǵanda, onyń aınalasyndaǵylardyń áreketi saldarynan mundaı jaǵdaılar odan ári ýshyǵa túsetinin aıtty. Bul memlekettik qyzmetkerler men qoǵam arasynda iritki týdyryp, tipti qaqtyǵystarǵa ulasýy múmkin edi.

«Sondyqtan men dosymdy qyzmetinen bosatý týraly sheshim qabyldaýǵa májbúr boldym. Men úshin memlekettiń turaqtylyǵy bárinen mańyzdy», - dep túıindedi prezıdent.

Aıta keteıik, Kamchybek Tashıev 13 aqpanǵa qaraǵan túni Qyrǵyzstanǵa oralǵan bolatyn.

Eske sala ketsek, 10 aqpanda Qyrǵyzstan prezıdenti Sadyr Japarovtyń jarlyǵymen Kamchybek Tashıev vıse-premer – Ulttyq qaýipsizdik memlekettik komıtetiniń (UQMK) tóraǵasy qyzmetinen bosatylǵany habarlanǵan edi.